અમદાવાદ: નારોલ પોલીસે એટીએમ ફ્રોડથી બચવા માટે આરોપીઓ પાસે કરાવ્યો લાઈવ ડેમો

અમદાવાદના નારોલ પોલીસ સ્ટેશન દ્વારા એટીએમમાં નાગરિકોનું કાર્ડ બદલીને થતી છેતરપિંડીના કિસ્સાઓને રોકવા માટે એક વિશેષ જાગૃતિ અભિયાન હાથ ધરવામાં આવ્યું છે. આ અંતર્ગત પોલીસે પકડાયેલા આરોપીઓ પાસે એટીએમમાં કેવી રીતે છેતરપિંડી આચરવામાં આવે છે તેનો લાઈવ ડેમો રજૂ કરાવ્યો હતો.

પોલીસે આ ડેમો દ્વારા સમજાવ્યું હતું કે ઠગ ટોળકી કેવી રીતે વાતોમાં ફસાવીને કે નજર ચૂકવીને ગ્રાહકોના કાર્ડ બદલી નાખે છે. નાગરિકોને સાવધ કરતા પોલીસે જણાવ્યું હતું કે એટીએમમાં પૈસા ઉપાડતી વખતે કોઈ પણ અજાણી વ્યક્તિની મદદ ક્યારેય લેવી નહીં.

આ ઉપરાંત, સુરક્ષાના ભાગરૂપે મશીનમાંથી બહાર નીકળતી વખતે ‘કેન્સલ’ કે ‘ક્લિયર’ બટન ચોક્કસ દબાવવાની સલાહ આપવામાં આવી છે. જો તમારું કાર્ડ મશીનમાં અટવાઈ જાય અથવા મશીન કામ ન કરતું હોય, તો ગભરાયા વગર તાત્કાલિક સંબંધિત બેંકનો સંપર્ક કરવો હિતાવહ છે.