ભરૂચના કરમદ રોડ પર હાઈ ટેન્શન વાયર લટકતી હાલતમાં જોવા મળ્યા

ભરૂચના કરમદ રોડ પરથી પસાર થતા હાઈ ટેન્શન વાયર અત્યંત નીચે નમી ગયા હોવાની ઘટના સામે આવી છે. આ વાયર જમીનની નજીક આવી ગયા હોવાથી રાહદારીઓ અને વાહનચાલકો માટે જોખમ ઊભું થયું છે.

સ્થાનિક લોકો દ્વારા આ અંગે ચિંતા વ્યક્ત કરવામાં આવી છે. હાઈ ટેન્શન લાઈન હોવાને કારણે અહીંથી પસાર થતા લોકોમાં અકસ્માતનો ભય ફેલાયો છે. આ માર્ગ પરથી મોટી સંખ્યામાં લોકોની અવરજવર રહેતી હોય છે, જેથી મોટી દુર્ઘટના થવાની શક્યતા નકારી શકાય તેમ નથી.

તંત્ર દ્વારા આ બાબતે તાત્કાલિક ધોરણે યોગ્ય તપાસ કરી વાયરને સુરક્ષિત ઊંચાઈ પર ગોઠવવાની માંગ સ્થાનિકો દ્વારા કરવામાં આવી છે, જેથી કોઈ પણ પ્રકારની જાનહાનિ ટાળી શકાય.