મહીસાગર જિલ્લામાં ૮૦મા સ્વાતંત્ર્ય પર્વની ભવ્ય ઉજવણી, કલેક્ટરના હસ્તે ધ્વજવંદન

મહીસાગર જિલ્લામાં ૮૦મા સ્વાતંત્ર્ય પર્વની આન, બાન અને શાન સાથે ભવ્ય ઉજવણી કરવામાં આવી. વીરપુર તાલુકાના વરધરા ખાતે જિલ્લા કલેક્ટર સુશ્રી અર્પિત સાગરના હસ્તે રાષ્ટ્રધ્વજ ફરકાવવામાં આવ્યો હતો. આ પ્રસંગે કલેક્ટરશ્રીએ ‘વિકસિત ભારત ૨૦૪૭’ના સંકલ્પને અનુરૂપ જિલ્લાની વિકાસગાથા અને સિદ્ધિઓ વિશે વિસ્તૃત માહિતી આપી હતી.

આ ઉજવણી દરમિયાન, વીરપુર તાલુકાના વિકાસ કાર્યો માટે ₹૨૫ લાખનો ચેક એનાયત કરવામાં આવ્યો. મહીસાગર જિલ્લાએ કેન્દ્રીય શિક્ષણ સર્વેમાં સમગ્ર રાજ્યમાં પ્રથમ સ્થાન મેળવી ગૌરવ પ્રાપ્ત કર્યું છે. આ ઉપરાંત, આરોગ્ય, કૃષિ અને સામાજિક કલ્યાણ જેવી વિવિધ યોજનાઓમાં જિલ્લા દ્વારા થયેલી નોંધપાત્ર કામગીરી અને સિદ્ધિઓનું પણ વર્ણન કરવામાં આવ્યું.

કાર્યક્રમમાં દેશભક્તિના રંગે રંગાયેલા સાંસ્કૃતિક કાર્યક્રમો યોજાયા હતા, જેણે ઉપસ્થિત સૌના હૃદયમાં દેશપ્રેમ જગાવ્યો હતો. પર્યાવરણના જતનનો સંદેશ આપવા માટે વૃક્ષારોપણ કાર્યક્રમ પણ આયોજિત કરાયો હતો. ઉત્કૃષ્ટ કામગીરી કરનાર કર્મયોગીઓને આ પ્રસંગે સન્માનિત કરવામાં આવ્યા હતા.