ભારત સરકારનો મોટર વહીકલ એગ્રીગેટર નિયમોમાં ફેરફાર, ટિપિંગ ફીચર હવે રાઈડ બાદ જ ઉપલબ્ધ

ભારત સરકારના સડક પરિવહન અને રાજમાર્ગ મંત્રાલયે તમામ કેબ અને ટેક્સી એગ્રીગેટર કંપનીઓ, જેમ કે Ola, Uber, Rapido વગેરે, માટે ટિપિંગ ફીચરના નિયમોમાં ફેરફાર કર્યો છે. નવા નિયમો અનુસાર, હવે કોઈપણ કંપની બુકિંગ સમયે ટીપ આપવા માટે જણાવી નહીં શકે, અને ટિપ માત્ર રાઈડ પૂરી થયા બાદ જ આપવામાં આવશે.

મંત્રાલયે જણાવ્યું હતું કે કેટલીક એપ પર રાઈડ બુક કરતી વખતે અથવા સવારી શરૂ થાય તે પહેલાં ગ્રાહકોને 'Advance Tip', 'Choose an Add-on', 'જલ્દી કન્ફર્મેશન માટે ટિપ ઉમેરો', અથવા 'જો તમે ટિપ આપશો તો ડ્રાઈવર રાઈડ જલ્દી સ્વીકારશે' જેવા મેસેજ કે ઓપ્શન દર્શાવવામાં આવતા હતા. આ પ્રકારના મેસેજ ગ્રાહકોને ગેરમાર્ગે દોરતા હતા.

'મોટર વહીકલ એગ્રીગેટર ગાઈડલાઈન્સ, 2025' ના ક્લોઝ 14.15 નો ઉલ્લેખ કરીને મંત્રાલયે સ્પષ્ટ કર્યું છે કે ગ્રાહક પોતાની મરજીથી ડ્રાઈવરને ટિપ આપી શકે છે, પરંતુ આ ફીચર માત્ર સવારી પૂરી થયા પછી જ દેખાવું જોઈએ. બુકિંગ સમયે, મુસાફરી શરૂ થાય તે પહેલાં કે મુસાફરી દરમિયાન કોઈપણ પ્રકારના મેસેજ કે ઓપ્શન આપવાનું નહીં.

મંત્રાલયે આ નિયમોના પાલન માટે તમામ એગ્રીગેટર્સને પોતાની એપ તાત્કાલિક રિવ્યુ કરવા અને ખોટા ઓપ્શન્સ તુરંત હટાવી લેવા માટે આદેશ આપ્યો છે. આ ફેરફાર ગ્રાહકોના હિતમાં લેવામાં આવ્યો છે અને તેમને વધુ સચોટ અને પારદર્શક સેવાઓ ઉપલબ્ધ કરાવવા માટે છે.