पुण्यातील गुंजवणी धरणातून २५० क्युसेक्स पाण्याचा विसर्ग, कोरडी नदीत पुन्हा पाणी

पुण्यातील राजगड तालुक्यातील गुंजवणी धरणातून विद्युतगृहामार्फत २५० क्युसेक्स दराने पाण्याचा विसर्ग नदीपात्रात सुरू करण्यात आला आहे. गेल्या अनेक दिवसांपासून धरणातून पाण्याचे आवर्तन सोडण्याची मागणी परिसरातील शेतकऱ्यांकडून जोरदार केली जात होती.

शेतकऱ्यांच्या या मागणीनंतर पुणे पाटबंधारे विभागाच्या आदेशानुसार, सोमवारी दुपारपासून धरणातून २५० क्युसेक्स पाणी गुंजवणी नदीपात्रात सोडण्यात आले आहे. नदीमध्ये हे आवर्तन सोडण्यात आल्याने, कोरडी पडलेली नदी पुन्हा एकदा दुथडी भरून वाहू लागली आहे.

या नदीच्या पाण्यावर अवलंबून असणाऱ्या गावांतील नागरिकांना या पाण्याचा शेती, पिण्याच्या पाण्यासाठी तसेच जनावरांसाठी उपयोग होणार आहे. त्यामुळे परिसरातील नागरिकांमध्ये समाधानाचे वातावरण पाहायला मिळत आहे.