मिरकरवाडा जेटीवर मच्छी खरेदी वादातून व्यावसायिकावर जीवघेणा हल्ला, गुन्हा दाखल

मिरकरवाडा जेटीवर मच्छी खरेदी वादातून व्यावसायिक रज्जाक हमजा साब (वय ४३) यांच्यावर लोखंडी फायटर व चाकूने जीवघेणा हल्ला करण्यात आला.

हल्ल्याच्या वेळी शफिक महमद शरीफ दर्वे (वय ४५) आणि अब्दुल्ला शफिक दर्वे (वय २२) यांनी रज्जाक साब यांना धमकावून घट्ट पकडले. अब्दुल्ला दर्वे यांनी लोखंडी फायटरने साब यांना डोके, चेहरा, छाती व पाठीवर मारहाण केली, त्यानंतर शफिक दर्वे यांनी लपवलेला चाकू काढून साब यांच्यावर उगारला, ज्यामुळे साब गंभीर जखमी झाले.

साक्षीदार व स्थानिक नागरिकांनी हस्तक्षेप करून रज्जाक साब यांना हल्लेखोरांच्या तावडीतून सुटका केली. त्यांना तातडीने रत्नागिरी शासकीय जिल्हा रुग्णालयात दाखल करण्यात आले व उपचार सुरू आहेत.

घटनेनंतर रत्नागिरी शहर पोलीस ठाण्यात गुन्हा दाखल करण्यात आला व पोलीस या प्रकरणाचा पुढील तपास करत आहेत.