પોરબંદરના ટીંબીનેશ ગામે દૂધમાં ભેળસેળ કરતી ડેરી પર LCBના દરોડા, જથ્થો જપ્ત

પોરબંદર જિલ્લાના કુતિયાણા તાલુકાના ટીંબીનેશ ગામે LCBની ટીમે બાતમીના આધારે એક સ્થળ પર દરોડો પાડ્યો હતો. આ કાર્યવાહી દરમિયાન ભેળસેળયુક્ત દૂધ બનાવીને વેચાણ કરતા સરમણ ગોગનભાઈ કોડીયાતર નામના શખ્સને પોલીસે ઝડપી લીધો હતો.

પોલીસની તપાસમાં સ્થળ પરથી મોટા પ્રમાણમાં ભેળસેળ માટે વપરાતી સામગ્રી મળી આવી હતી. જેમાં ૩૦ લીટર શંકાસ્પદ દૂધ, ૭૫ કિલો સ્કીમ મિલ્ક પાઉડર અને પામોલીન તેલના ૧૪ ડબ્બાનો સમાવેશ થાય છે. પોલીસે આ તમામ મુદ્દામાલ કબજે કરીને આગળની કાયદેસરની કાર્યવાહી હાથ ધરી છે.

આરોપી દ્વારા દૂધમાં ભેળસેળ કરીને ગ્રાહકોના સ્વાસ્થ્ય સાથે ચેડાં કરવામાં આવતા હોવાની માહિતી મળતા પોલીસે આ સફળ ઓપરેશન પાર પાડ્યું હતું. હાલમાં પોલીસે આરોપીની ધરપકડ કરી વધુ તપાસ શરૂ કરી છે.