કડીના વિડજ ગામે LCBનો સપાટો: દેશી દારૂની બે ચાલુ ભઠ્ઠીઓ ઝડપી, 4.76 લાખનો મુદ્દામાલ જપ્ત

મહેસાણા લોકલ ક્રાઇમ બ્રાન્ચ (LCB) દ્વારા કડી પોલીસ સ્ટેશન વિસ્તારમાં આવતા વિડજ ગામની સીમમાં દરોડા પાડવામાં આવ્યા હતા. પોલીસને મળેલી બાતમીના આધારે પોયણી તલાવડીના કિનારે બાવળની ઝાડીમાં અને વિડજ ગામમાં એક મકાનની બહાર ચાલતી દેશી દારૂની બે ભઠ્ઠીઓ પર કાર્યવાહી કરવામાં આવી હતી.

આ દરોડા દરમિયાન પોલીસે કુલ 18,000 લીટર વોશ અને 120 લીટર દેશી દારૂનો જથ્થો કબજે કર્યો હતો. આ ઉપરાંત, એક મોબાઈલ ફોન પણ જપ્ત કરવામાં આવ્યો હતો. દેશી દારૂ ગાળવા માટે ઉપયોગમાં લેવાતા 200 લીટરના 90 પ્લાસ્ટિકના પીપ અને અન્ય સાધન સામગ્રીનો પોલીસ દ્વારા સ્થળ પર જ નાશ કરવામાં આવ્યો હતો. જપ્ત કરાયેલા કુલ મુદ્દામાલની કિંમત રૂ. 4.76 લાખ હોવાનું પોલીસની પ્રેસનોટમાં જણાવાયું છે.

દરોડા દરમિયાન આરોપીઓ સ્થળ પર મળી આવ્યા નહોતા. આ મામલે ભાવેશજી રમેશજી ઠાકોર, ખોડાજી કાળાજી ઠાકોર અને જીગરજી ઉર્ફે જીગો જીલુજી ઠાકોર વિરુદ્ધ કડી પોલીસ સ્ટેશનમાં પ્રોહિબિશન એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે.