ધોકડવા-બેડીયા રોડ પર બાઈક અને ડમ્પર વચ્ચે ટક્કર: IIFL ફાઈનાન્સના કર્મચારીનું ઘટનાસ્થળે મોત

ગીર ગઢડા તાલુકાના ધોકડવા-બેડીયા રોડ પર આજે એક ગંભીર અકસ્માત સર્જાયો હતો. બાઈક અને ડમ્પર વચ્ચે થયેલી જોરદાર ટક્કરમાં IIFL ફાઈનાન્સ કંપનીના કર્મચારી હિંમતભાઈ વાળાનું ઘટનાસ્થળે જ મોત નિપજ્યું હતું.

મૃતક હિંમતભાઈ વાળા ઉમેજ ગામના રહેવાસી હતા અને તેઓ IIFL ફાઈનાન્સ કંપનીની ધોકડવા બ્રાંચમાં ફરજ બજાવતા હતા. પ્રાપ્ત માહિતી અનુસાર, આજે સવારે તેઓ પોતાના વતન ઉમેજથી બાઈક પર ધોકડવા ખાતે નોકરી પર જઈ રહ્યા હતા.

આ દરમિયાન, ધોકડવા-બેડીયા રોડ ઉપર પુરપાટ ઝડપે આવી રહેલા એક ડમ્પર સાથે તેમની બાઈકની જોરદાર ટક્કર થઈ હતી. આ અકસ્માત એટલો ભયાનક હતો કે હિંમતભાઈ વાળાને માથાના ભાગે ગંભીર ઈજાઓ પહોંચી હતી, જેના કારણે તેમનું ઘટના સ્થળે જ દુઃખદ અવસાન થયું હતું.