સચીન GIDC પોલીસે ઓડિશાના વોન્ટેડ NDPS આરોપીને ઝડપી પાડ્યો

સુરત શહેરના સચીન GIDC પોલીસ સ્ટેશન વિસ્તારમાંથી ગેરકાયદે કેફી દ્રવ્યોની હેરાફેરીના ગુનામાં લાંબા સમયથી ફરાર રહેલા ઓડિશાના વોન્ટેડ આરોપીને પોલીસે ઝડપી પાડ્યો છે. NDPS એક્ટ હેઠળ નોંધાયેલા ગુનામાં સચોટ બાતમીના આધારે દરોડો પાડીને સચીન GIDC પોલીસે આરોપીને કોર્ડન કરી જેલભેગો કર્યો છે.

પોલીસના હાથે ઝડપાયેલા ૨૪ વર્ષીય આરોપીનું નામ મધુ જોગી સાહુ છે. આરોપી મૂળ ઓડિશા રાજ્યના ગંજામ જિલ્લાના કન્યારીબાડી ગામનો વતની છે. તે સુરતના સચીન GIDC વિસ્તારમાં આવેલા સાંઈભુપત સોસાયટીમાં મકાન રાખીને છુપાઈને રહેતો હતો.

સચીન GIDC પોલીસ મથકમાં મધુ સાહુ સામે NDPS એક્ટની કલમો હેઠળ માદક પદાર્થોની ગેરકાયદે હેરાફેરીનો ગુનો નોંધાયેલો હતો. ગુનો નોંધાયા બાદથી જ આરોપી પોલીસ ધરપકડથી બચવા નાસતો ફરતો હતો. પોલીસે બાતમીના આધારે વોચ ગોઠવી તેને દબોચી લીધો છે અને આગળની પૂછપરછ હાથ ધરી છે.