સુરતના સચિન GIDCમાં 8 વર્ષીય બાળકી પર દુષ્કર્મ, પોલીસે કલાકોમાં આરોપીને ઝડપ્યો

સુરતના સચિન GIDC વિસ્તારમાં એક ચોંકાવનારી ઘટના સામે આવી છે, જ્યાં 35 વર્ષીય શખસે 8 વર્ષીય બાળકી પર દુષ્કર્મનો ગુનો આચર્યો હતો. મળતી માહિતી પ્રમાણે, આ બાળકીના ઘરમાં શૌચાલયની સુવિધા ઉપલબ્ધ ન હોવાથી તેણે ઘરની નજીક આવેલી ખુલ્લી જગ્યાએ શૌચક્રિયા માટે જવાનું નક્કી કર્યું હતું. આ દરમિયાન જ આરોપી શખસે બાળકી પર હુમલો કરી દુષ્કર્મ આચર્યું હતું.

આ હેવાનિયત બાદ ભયભીત થઈ ગયેલી માસૂમ બાળકી રડતી હાલતમાં ઘટનાસ્થળથી આશરે 100 મીટર દૂર આવેલા પોતાના ઘરે પહોંચી હતી. ઘરે પહોંચ્યા બાદ બાળકીએ તેની માતાને સમગ્ર આપવીતી વિશે જણાવ્યું હતું, જેથી પરિવારમાં ચકચાર મચી ગઈ હતી.

આ ચકચારી ઘટનાની જાણ થતાં સચિન GIDC પોલીસે તુરંત કાર્યવાહી શરૂ કરી હતી. પોલીસ દ્વારા ગણતરીના કલાકોમાં જ આરોપી શખસને ઝડપી પાડવામાં સફળતા મળી છે. હાલમાં પોલીસ દ્વારા આરોપી વિરુદ્ધ ગુનો નોંધીને તપાસ હાથ ધરી છે.