મહારાષ્ટ્ર FDAએ શાહરુખ ખાન, અજય દેવગન અને ટાઇગર શ્રોફને નોટિસ ફટકારી

મહારાષ્ટ્રના ફૂડ એન્ડ ડ્રગ્સ એડમિનિસ્ટ્રેશન (FDA) દ્વારા જાણીતા અભિનેતાઓ શાહરુખ ખાન, અજય દેવગન અને ટાઇગર શ્રોફને 'વિમલ ઇલાયચી' જાહેરાત અંગે નોટિસ ફટકારી છે. FDAના આરોપ મુજબ, આ જાહેરાત પ્રતિબંધિત પાન મસાલા બ્રાન્ડનો સરોગેટ પ્રચાર હોઈ શકે છે.

FDAએ ત્રણેય અભિનેતાઓ પાસેથી જાહેરાતમાં તેમની ભૂમિકા અંગે સ્પષ્ટ જવાબ માંગ્યો છે. જો FSS એક્ટની જોગવાઈઓ હેઠળ આ જાહેરાત ભ્રામક સાબિત થાય, તો 10 લાખ રૂપિયાના દંડનો સામનો કરવો પડી શકે છે.

મહારાષ્ટ્રમાં પાન મસાલાના ઉત્પાદન, સંગ્રહ, સપ્લાય અને વેચાણ પર હાલ પ્રતિબંધ લાગુ છે. FDA કમિશનર તુકારામ મુંઢેના નેતૃત્વમાં વિભાગ તંબાકુ અને સરોગેટ પ્રમોશન સામે કડક કાર્યવાહી કરી રહ્યો છે.