भोर शहरातील जीर्ण झाडांच्या छाटणीसाठी पत्रकार संघाचे नगरपालिकेत आंदोलन

भोर शहरातील पंचायत समिती परिसरात असलेले जीर्ण झाड छाटणीसाठी नगरपालिकेला वारंवार निवेदने देऊन आणि तोंडी सूचना देऊनही टाळाटाळ केली जात होती. या विरोधात भोर तालुका पत्रकार संघाच्या वतीने भोर नगरपालिकेत आंदोलन करण्यात आले.

पत्रकार संघाच्या सदस्यांनी प्रशासनाच्या या निष्क्रियतेवर नाराजी व्यक्त केली. नागरिकांच्या सुरक्षिततेच्या दृष्टीने धोकादायक ठरू शकणाऱ्या झाडांच्या छाटणीकडे दुर्लक्ष करणे योग्य नसल्याचे त्यांचे म्हणणे होते.

या आंदोलनानंतर, नगरपालिकेने लेखी स्वरूपात कार्यवाहीचे आश्वासन दिल्यानंतर पत्रकार संघाने आपले आंदोलन तात्पुरते स्थगित केले. यावेळी भोर तालुका पत्रकार संघाचे अध्यक्ष, उपाध्यक्ष, डिजिटल मीडियाचे अध्यक्ष, उपाध्यक्ष आणि सर्व सदस्य उपस्थित होते.