સુરતમાં ઈર્ષ્યામાં પૂર્વ પ્રેમિકાએ મંગેતર અને તેની માતાના AI જનરેટેડ અશ્લીલ ફોટા વાયરલ કર્યા

સુરત શહેરમાં એક ચોંકાવનારી ઘટના સામે આવી છે, જ્યાં એક યુવતીએ પોતાના પૂર્વ પ્રેમીના નવા સંબંધોથી ઈર્ષ્યા રાખીને બદલો લેવા માટે એક ગંભીર ગુનો આચર્યો છે. આરોપી મહિલા ભૂમિકા ધર્મેશભાઈ ધુલિયા, જે અગાઉ જે યુવક સાથે પ્રેમસંબંધમાં હતી, તે જ યુવકની સગાઈ અન્ય યુવતી સાથે થઈ જતાં તે માનસિક રીતે આઘાતમાં હતી. પોતાના તૂટેલા પ્રેમનો બદલો લેવા અને આ નવું સગપણ તોડાવવાના ઈરાદાથી તેણે આ કૃત્ય કર્યું હતું.

પોતાના પૂર્વ પ્રેમીની મંગેતર અને તેની માતાને સમાજમાં બદનામ કરવાના ઈરાદે ભૂમિકાએ આ કૃત્ય કર્યું હતું. તેણે AI (આર્ટિફિશિયલ ઇન્ટેલિજન્સ) ટેકનોલોજીનો દુરુપયોગ કરીને બંને પીડિતાના આપત્તિજનક ન્યૂડ ફોટા અને વીડિયો જનરેટ કર્યા હતા. આ માટે તેણે ફરિયાદી યુવતી અને તેની માતાના સામાન્ય ફોટો મેળવીને AI ટૂલ્સનો ઉપયોગ કર્યો હતો.

આરોપી મહિલાએ પોતાની ઓળખ છુપાવવા માટે સોશિયલ મીડિયા પ્લેટફોર્મ ઈન્સ્ટાગ્રામ પર અલગ-અલગ નકલી આઈડી ઊભા કર્યા હતા. આ ફેક પ્રોફાઇલ્સ પરથી તેણે બંને પીડિતાના અશ્લીલ ફોટો અને વીડિયો અપલોડ કરીને વાયરલ કરવાનું શરૂ કર્યું. તેનો મુખ્ય ઉદ્દેશ્ય પીડિતાના સંબંધોમાં તિરાડ પાડવાનો અને પરિવારની સામાજિક પ્રતિષ્ઠાને નુકસાન પહોંચાડવાનો હતો. પૂર્વ પ્રેમી પ્રત્યેનો આક્રોશ અને અદેખાઈ આ સમગ્ર ગુનાનું મુખ્ય કારણ બન્યા હતા.