માં અંબે મંદિર તરફ જતાં રસ્તા (નાળિયા)માં સવારના 9:30 વાગ્યે દારૂની મહેફિલ?

બાયડ શહેરમાં દારૂબંધીના અમલને લઈને ફરી એક વખત ગંભીર સવાલો ઊભા થયા છે. બાયડના રામના તળાવ પાસે આવેલા માં અંબે માતાજીના મંદિર નજીકના વિસ્તારમાં સવારના સમયે દારૂની મહેફિલ યોજાઈ હોવાનો આક્ષેપ સામે આવ્યો છે.
રામના તળાવ પાસે આવેલા માં અંબે માતાજીના મંદિરે દરરોજ મોટી સંખ્યામાં શ્રદ્ધાળુઓ દર્શન માટે આવતા હોય છે. મંદિર તરફ જવા માટેના વિવિધ રસ્તાઓ પૈકી પાણીની ટાંકી પાસેથી પસાર થતો પગપાળા રસ્તો, જેને સ્થાનિક લોકો ‘નાળિયા’ તરીકે ઓળખે છે, ત્યાં તા. 5 સપ્ટેમ્બરના રોજ સવારે આશરે 9:30 વાગ્યાના અરસામાં કેટલાક શખ્સો દારૂની મહેફિલ જમાવીને બેઠા હતા.
રસ્તો બ્લોક કરી મહેફિલ જમાવી હતી
મળતી માહિતી મુજબ, નજીકના ખેતરમાં જતા એક ખેડૂત માલિકે આ દૃશ્ય જોયું હતું. આક્ષેપ છે કે રસ્તા વચ્ચે બેસેલા શખ્સોના કારણે પસાર થવામાં પણ મુશ્કેલી સર્જાઈ હતી. ઘટનાની જાણ સ્થાનિક ન્યૂઝના અહેવાલવીર/રિપોર્ટિંગ ટીમને થતાં તેઓ રિપોર્ટિંગ માટે સ્થળ પર પહોંચ્યા હતા.
રિપોર્ટિંગ ટીમ સ્થળ પર પહોંચતા ત્યાં હાજર શખ્સોમાં અફરાતફરી મચી ગઈ હતી અને તેઓ સ્થળ પરથી ભાગી છૂટ્યા હતા.
ઘટનાસ્થળેથી મળેલો દારૂ અને સામાન
ઘટનાસ્થળેથી દારૂની બોટલો તથા અન્ય સામાન મળી આવ્યો હોવાનું અહેવાલમાં જણાવાયું છે.