ડીસામાં 90થી વધુ ઘરફોડ ચોરીના ગુનાઓમાં સંડોવાયેલા આરોપીને LCB પાલનપુરે ઝડપાવ્યો

બનાસકાંઠા જિલ્લામાં ઘરફોડ ચોરીના ગુનાઓને અંજામ આપતા તત્વો સામે પોલીસે કડક કાર્યવાહી હાથ ધરી છે. ડીસા શહેર ઉત્તર પોલીસ સ્ટેશન વિસ્તારમાં થયેલી ઘરફોડ ચોરીના ગુનાનો ભેદ લોકલ ક્રાઈમ બ્રાન્ચ (LCB), પાલનપુર દ્વારા સફળતાપૂર્વક ઉકેલવામાં આવ્યો છે.

પોલીસે વિપુલભાઈ ઉર્ફે રેણી માધાભાઈ લુહારને ઝડપી પાડ્યો હોવાનું જાણવા મળ્યું છે. પોલીસ તપાસમાં આરોપી અગાઉના 90થી વધુ ઘરફોડ ચોરીના ગુનાઓ સાથે સંડોવાયેલો હોવાની માહિતી સામે આવી છે. આ તપાસ દરમિયાન આરોપી પાસેથી ફ્લશ વાલ્વ તથા માઇક્રો-કન્સ્ટ્રીન વાલ્વ નંગ-3 સહિત અંદાજે રૂ.3,000નો મુદ્દામાલ કબજે કરવામાં આવ્યો છે.

સમગ્ર કાર્યવાહી બનાસકાંઠા પોલીસના ઉચ્ચ અધિકારીઓના માર્ગદર્શન હેઠળ LCB પાલનપુરની ટીમ દ્વારા કરવામાં આવી હતી. હાલમાં આરોપી સામે કાયદેસરની કાર્યવાહી હાથ ધરવામાં આવી છે.