ગોંડામાં મહિલાની 8 વર્ષની મહેનત પર પાણી ફરી વળ્યું: ઉંદરોએ ₹12 લાખની રોકડ કતરી નાખી

ઉત્તર પ્રદેશના ગોંડા જિલ્લામાંથી એક અત્યંત ચોંકાવનારો કિસ્સો પ્રકાશમાં આવ્યો છે. એક મહિલાએ છેલ્લા 8 વર્ષથી પતિની નજરથી બચાવીને સોનાના દાગીના ખરીદવાના સપના સાથે ₹12 લાખની બચત કરી હતી. આ રકમ તેણે સુરક્ષિત રાખવા માટે તિજોરીમાં મૂકી હતી.

જોકે, જ્યારે મહિલાએ લાંબા સમય બાદ તિજોરી ખોલી ત્યારે તેને મોટો આઘાત લાગ્યો હતો. તિજોરીમાં રાખેલી તમામ રોકડ નોટોને ઉંદરોએ કાપીને ટુકડા કરી નાખી હતી. પોતાની વર્ષોની મહેનત ક્ષણભરમાં નષ્ટ થઈ જતાં મહિલા સ્તબ્ધ થઈ ગઈ હતી.

હાલમાં મહિલાના પતિ નોટોના આ ટુકડાઓને ભેગા કરીને થયેલા નુકસાનનો અંદાજ લગાવવાનો પ્રયાસ કરી રહ્યા છે. આ વિચિત્ર ઘટનાનો વીડિયો હાલ સોશિયલ મીડિયા પર ખૂબ જ વાયરલ થઈ રહ્યો છે, જે ચર્ચાનો વિષય બન્યો છે.