ન્યૂ નરોડાની 'આમ જનમત' પાર્ટીનું કરોડોનું ટેક્સ ચોરીનું કૌભાંડ, 8 સામે CID ક્રાઈમમાં ફરિયાદ

ન્યૂ નરોડા વિસ્તારમાંથી રજીસ્ટર થયેલી 'આમ જનમત' નામની એક પોલિટિકલ પાર્ટી કરોડો રૂપિયાના કૌભાંડમાં ફસાઈ છે. આ પાર્ટી માત્ર કાગળ પર અસ્તિત્વ ધરાવતી હોવાનું અને કરદાતાઓ પાસેથી ફંડના નામે મોટી રકમ ઉઘરાવીને ટેક્સ ચોરી કરતી હોવાનું સામે આવ્યું છે. પાર્ટીએ અત્યાર સુધીમાં 800 કરોડ રૂપિયાથી વધુની નાણાકીય હેરફેર કરી હોવાનો અંદાજ છે, જેમાં ₹250 કરોડની ટેક્સ ચોરી પકડાઈ છે.

CID ક્રાઈમમાં નોંધાયેલી ફરિયાદ મુજબ, આવી પાર્ટીઓનો મુખ્ય હેતુ ચૂંટણી લડવાનો કે જનતાના હિતનો હોતો નથી, પરંતુ તેઓ માત્ર કમિશન કમાવવાના હેતુથી કાર્યરત હોય છે. આ કૌભાંડમાં 'આમ જનમત' પાર્ટીના અધ્યક્ષ સહિત કુલ 8 લોકો સામે ગુનો નોંધી કાયદેસરની કાર્યવાહી હાથ ધરવામાં આવી છે.

આ કૌભાંડથી સ્પષ્ટ થાય છે કે કેટલીક સંસ્થાઓ માત્ર નામના રાજકીય પક્ષો બનાવીને નાણાકીય ગેરરીતિઓને અંજામ આપે છે. આ તપાસ બાદ આવા વધુ કિસ્સાઓ બહાર આવે તેવી શક્યતા છે.