અમદાવાદ: રાણીપમાં જૂની અદાવતમાં યુવકની ઘાતકી હત્યા, 8-10 લોકોના ટોળાએ કર્યો હુમલો

અમદાવાદ શહેરમાં રાણીપ વિસ્તારમાં RTO સર્કલ ચાર રસ્તા પાસે, પોલીસ ચોકીની બિલકુલ નજીક એક ચોંકાવનારી હત્યાની ઘટના સામે આવી છે. પ્રાપ્ત માહિતી અનુસાર, 37 વર્ષીય અજય સાલ્વી નામના યુવક પર જૂની અદાવત રાખીને 8 થી 10 લોકોના ટોળાએ ઘાતકી હુમલો કર્યો હતો.

હુમલાખોરોએ તીક્ષ્ણ હથિયારોનો ઉપયોગ કર્યો હતો અને યુવકની પીઠના ભાગે 15 થી વધુ ઘા ઝીંક્યા હતા. આ હુમલામાં અજય ગંભીર રીતે ઈજાગ્રસ્ત થયો હતો. તેને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો, પરંતુ દુર્ભાગ્યે હોસ્પિટલમાં સારવાર દરમિયાન તેનું મોત નીપજ્યું હતું.

આ ઘટના બાદ સમગ્ર વિસ્તારમાં ચકચાર મચી જવા પામી છે. પોલીસે ઘટનાસ્થળે પહોંચી વધુ તપાસ હાથ ધરી છે. પોલીસ દ્વારા આરોપીઓને ઝડપી પાડવા માટે ચક્રો ગતિમાન કરવામાં આવ્યા છે અને આ મામલે ઊંડાણપૂર્વક તપાસ ચાલી રહી છે.