અમદાવાદ: નરોડામાંથી અમેરિકનોને છેતરતું ક્રિપ્ટો કૌભાંડ ઝડપાયું, 7 ઝડપાયા

અમદાવાદના નરોડા વિસ્તારમાં અમેરિકન નાગરિકોને નિશાન બનાવતું એક મોટું કોલ સેન્ટર ઝડપાયું છે. પોલીસના જણાવ્યા અનુસાર, આરોપીઓ બેંકના વકીલ તરીકે લોકોને છેતરપિંડી કરતા હતા અને ક્રિપ્ટોકરન્સી દ્વારા નાણાં મેળવતા હતા. આ રેકેટનો પર્દાફાશ નરોડાના હંસપુરા આર્કેડમાંથી થયો છે, જ્યાંથી યુવતી સહિત કુલ 7 લોકોની ધરપકડ કરવામાં આવી છે અને તેમની પાસેથી 7 લેપટોપ પણ જપ્ત કરવામાં આવ્યા છે.

પોલીસ તપાસમાં એવી માહિતી સામે આવી છે કે આ કોલ સેન્ટર દ્વારા અત્યાર સુધીમાં 200 થી વધુ લોકોને નિશાન બનાવવામાં આવ્યા છે. આ ઠગાઈ દ્વારા આશરે 38 લાખ રૂપિયાની રકમ મેળવવામાં આવી હોવાનું પ્રાથમિક તપાસમાં બહાર આવ્યું છે. પોલીસ આ સમગ્ર કૌભાંડના મૂળ સુધી પહોંચવા અને વધુ આરોપીઓને ઝડપી પાડવા માટે તપાસ ચલાવી રહી છે.

આરોપીઓ અમેરિકન નાગરિકોને ફોન કરીને બેંક સંબંધિત સમસ્યાઓનું નિરાકરણ લાવવાના બહાને વિશ્વાસમાં લેતા હતા અને ત્યારબાદ તેમને ક્રિપ્ટોકરન્સી દ્વારા પૈસા ટ્રાન્સફર કરવા માટે સમજાવતા હતા. આ રીતે તેઓ મોટી રકમની ઠગાઈ કરતા હતા. પોલીસે આ રેકેટમાં સામેલ અન્ય લોકોની શોધખોળ શરૂ કરી છે.