રાજકોટમાં 5,000 રૂપિયા થી વધુની સાયબર ઠગાઈ માટે હવે ઓટોમેટિક ઈ-એફઆઈઆર નોંધાશે

રાજકોટમાં સાયબર ફ્રોડની ફરિયાદો માટે નવી ડિજિટલ પ્રક્રિયા શરૂ કરવામાં આવી છે. 5,000 રૂપિયા કરતાં વધુની છેતરપિંડીની ફરિયાદ કરવામાં આવે તો ઈ-એફઆઈઆર (Electronic First Information Report) આપમેળે નોંધાશે, જેથી સમય બચાવીને પોલીસ સ્ટેશન સુધી પહોંચવાની જરૂરિયાત ન રહે.

નાગરિકોને તાત્કાલિક મદદ માટે 1930 હેલ્પલાઇન નંબર આપવામાં આવ્યો છે. આ નંબર પર કોલ કરતા જ ફરિયાદ નોંધાઈ જશે અને સંબંધિત પોલીસ સ્ટેશનમાં ઓટોમેટિક રીતે ટ્રાન્સફર થશે.

નાની રકમની છેતરપિંડીની ફરિયાદો માટે પણ પોલીસ સ્ટેશન કક્ષાએ નાણાં પરત મેળવવાની અને ગુનો નોંધવાની કાર્યવાહી કરવામાં આવશે. આ પગલાંથી નાગરિકોનો સમય બચશે અને પોલીસ સ્ટેશનના ભારમાં ઘટાડો થશે.

આ નવી વ્યવસ્થા દ્વારા સાયબર ફ્રોડના શિકારોને ઝડપી ન્યાય મળે તેવી અપેક્ષા છે, અને પોલીસ વિભાગ દ્વારા આ પ્રક્રિયાની અસરકારકતા પર નજર રાખવામાં આવશે.