નરોડા પોલીસે ફિલ્મી ઢબે પીછો કરી દારૂ ભરેલી સ્કોર્પિયો ગાડી ઝડપી, 3.45 લાખનો દારૂ અને 13.45 લાખનો મુદ્દામાલ કબજે

અમદાવાદના નરોડા વિસ્તારમાં પોલીસે દારૂની હેરાફેરી કરતા એક મોટા રેકેટનો પર્દાફાશ કર્યો છે. પોલીસે એક સ્કોર્પિયો ગાડીની નંબર પ્લેટ બદલીને દારૂની હેરાફેરી કરતા ઈસમોને નાના ચિલોડા પાસેથી ફિલ્મી ઢબે પીછો કરી ઝડપી પાડ્યા હતા. આ કાર્યવાહી દરમિયાન પોલીસે ગાડીમાંથી 3.45 લાખ રૂપિયાથી વધુ કિંમતનો દારૂ ઝડપી પાડ્યો હતો.

પોલીસ સૂત્રોના જણાવ્યા અનુસાર, નરોડા પોલીસને બાતમી મળી હતી કે એક સ્કોર્પિયો ગાડીમાં દારૂની હેરાફેરી કરવામાં આવી રહી છે. બાતમીના આધારે પોલીસે નાના ચિલોડા પાસે વોચ ગોઠવી હતી. દરમિયાન, શંકાસ્પદ સ્કોર્પિયો ગાડી પસાર થતાં પોલીસે તેને રોકવાનો પ્રયાસ કર્યો હતો. જોકે, ચાલકે ગાડી ભગાવી મૂકતાં પોલીસે ફિલ્મી ઢબે તેનો પીછો કર્યો હતો.

લાંબા પીછાં બાદ પોલીસે આખરે ગાડીને ઝડપી લીધી હતી. ગાડીની તલાશી લેતાં તેમાંથી મોટી માત્રામાં વિદેશી દારૂ મળી આવ્યો હતો, જેની કિંમત આશરે 3.45 લાખ રૂપિયા આંકવામાં આવી છે. પોલીસે ગાડી અને દારૂ સહિત કુલ 13.45 લાખ રૂપિયાનો મુદ્દામાલ કબજે કર્યો છે. જોકે, આ દારૂની હેરાફેરીમાં સામેલ આરોપીઓ પોલીસને ચકમો આપી ફરાર થવામાં સફળ રહ્યા હતા, જેઓને ઝડપી પાડવા માટે પોલીસે તપાસના ચક્રો ગતિમાન કર્યા છે.