અમરેલી: વાંકીયા ગામે ગેરકાયદે રેતી ખનન પર ખાણ-ખનીજ વિભાગનો સપાટો, રૂ. 32 લાખનો મુદ્દામાલ જપ્ત

અમરેલી તાલુકાના વાંકીયા ગામે આજે સવારે ખાણ-ખનીજ વિભાગ દ્વારા ગેરકાયદે રેતી ખનન પ્રવૃત્તિ સામે એક મોટી કાર્યવાહી હાથ ધરવામાં આવી છે. બાતમીદારો પાસેથી મળેલી ચોક્કસ માહિતીના આધારે, વિભાગની ટીમે સ્થળ પર પહોંચીને દરોડો પાડ્યો હતો.

આ દરોડા દરમિયાન, ગેરકાયદેસર ખનીજ પ્રવૃત્તિમાં ઉપયોગમાં લેવાતા 2 ડમ્પર, 2 ટ્રેક્ટર અને રેતી ચાળવા માટેના ચારણા સહિતનો અંદાજે રૂ. 32 લાખનો મુદ્દામાલ કબજે કરી સીઝ કરવામાં આવ્યો છે. આ કાર્યવાહીથી ગેરકાયદે ખનન કરતા તત્વોમાં ફફડાટ ફેલાયો છે.

ખાણ-ખનીજ વિભાગ દ્વારા આ મામલે કાયદેસરની કાર્યવાહી હાથ ધરવામાં આવી છે. અધિકારીઓએ જણાવ્યું હતું કે, ગેરકાયદે રેતી ખનનની પ્રવૃત્તિઓને ડામવા માટે આવા દરોડા સમગ્ર જિલ્લામાં નિયમિતપણે ચાલુ રાખવામાં આવશે.