અમદાવાદ: અસલાલી પોલીસે દારૂનું કટીંગ ઝડપી પાડ્યું, 2.5 લાખનો દારૂ અને 2 કાર કબજે

અમદાવાદ જિલ્લાના અસલાલી પોલીસ સ્ટેશન વિસ્તારમાં પોલીસને મોટી સફળતા મળી છે. અસલાલી ગામમાં શ્રીજી બંગ્લોઝની પાછળ ટીપી રોડ પર એક ગાડીમાંથી બીજી ગાડીમાં દારૂનું કટીંગ થઈ રહ્યું હતું તે દરમિયાન અસલાલી પોલીસે બાતમીના આધારે દરોડો પાડ્યો હતો.

પોલીસે આ કાર્યવાહી દરમિયાન 2.5 લાખ રૂપિયાથી વધુ કિંમતની દારૂની 1552 બોટલો કબજે કરી છે. આ દારૂનું કટીંગ એક જગ્યાએથી બીજી જગ્યાએ પહોંચાડવાની તૈયારીમાં હતું.

પોલીસે ઘટનાસ્થળેથી બે કાર પણ કબજે લીધી છે. આ મામલે પોલીસે અશોક બિશ્નોઈ, નરેન્દ્ર રાજપુત, અનુજ શર્મા અને જીગ્નેશ વાઘેલા નામના ચાર આરોપીઓની ધરપકડ કરી છે. પોલીસે વધુ તપાસ હાથ ધરી છે કે આ દારૂ ક્યાંથી આવ્યો હતો અને ક્યાં પહોંચાડવાનો હતો.