વાગરા નજીક સાયખામાંથી 24 હજાર લીટર એસિટિક એસિડનો જથ્થો ઝડપાયો, 39.04 લાખનો મુદ્દામાલ જપ્ત

ભરૂચ જિલ્લાના વાગરા તાલુકાના સાયખા નજીકથી પોલીસે બિલ અને દસ્તાવેજો વગર 24 હજાર લીટર એસિટિક એસિડનો જથ્થો લઈ જતા ત્રણ વાહનોને ઝડપી પાડ્યા છે. આ ગેરકાયદે કેમિકલ પરિવહનનો પર્દાફાશ થતાં પોલીસ તંત્ર હરકતમાં આવ્યું હતું.

પોલીસે આ કાર્યવાહી દરમિયાન ત્રણ વાહનો અને ત્રણ ઈસમોને પણ ઝડપી પાડ્યા છે. પ્રાથમિક તપાસમાં વાહનોમાં રહેલું એસિટિક એસિડ ક્યાંથી આવ્યું અને ક્યાં લઈ જવાઈ રહ્યું હતું તે અંગેના કોઈ કાયદેસરના દસ્તાવેજો મળી આવ્યા ન હતા. આથી પોલીસે તમામ મુદ્દામાલ કબજે કર્યો છે.

આ સમગ્ર મામલે પોલીસે 39.04 લાખ રૂપિયાનો મુદ્દામાલ જપ્ત કર્યો છે. જેમાં એસિટિક એસિડનો જથ્થો, વાહનો અને અન્ય સંબંધિત વસ્તુઓનો સમાવેશ થાય છે. પોલીસે આ કેમિકલના ગેરકાયદે પરિવહન અંગે વધુ તપાસ હાથ ધરી છે અને આ રેકેટમાં અન્ય કોઈ સામેલ છે કે કેમ તે દિશામાં પણ તપાસ ચાલી રહી છે.