શંકરસિંહ વાઘેલાની કોંગ્રેસમાં વાપસીની અટકળો તેજ: ગાંધીનગર મનપા ચૂંટણી અને 2027 વિધાનસભા ચૂંટણી પહેલા રાજકીય ગરમાવો

ગાંધીનગર મહાનગરપાલિકા (મનપા) ની આગામી ચૂંટણી અને 2027ની ગુજરાત વિધાનસભા ચૂંટણી પહેલા પૂર્વ મુખ્યમંત્રી શંકરસિંહ વાઘેલા (બાપુ) ની કોંગ્રેસમાં વાપસીની ચર્ચાઓએ જોર પકડ્યું છે. સૂત્રોના જણાવ્યા અનુસાર, ઓલ ઇન્ડિયા કોંગ્રેસ કમિટિ (AICC) ના જનરલ સેક્રેટરી અને ગુજરાત કોંગ્રેસના રણનીતિકાર રણદીપ સુરજેવાલા સેન્ટ્રલ પ્લાનિંગ સાથે ગુજરાતની મુલાકાતે છે અને તેઓ બાપુ સાથે સંપર્કમાં હોવાની ચર્ચા છે.

ચર્ચાઓ મુજબ, ગાંધીનગર મહાનગરપાલિકાની ચૂંટણીમાં કોંગ્રેસને મજબૂત કરવા અને જીત અપાવવા માટે બાપુને મહત્વની જવાબદારી સોંપવામાં આવી શકે છે. જો બાપુ સત્તાવાર રીતે જોડાય છે, તો 2027ની વિધાનસભા ચૂંટણીમાં ભાજપ સામે એન્ટી-ઇન્કમ્બન્સીનો લાભ ખાટવા માટે કોંગ્રેસના કેમ્પમાં તેઓ મુખ્ય રણનીતિકાર સાબિત થઈ શકે છે.

જોકે, આ અટકળો વચ્ચે તાજેતરમાં જ શંકરસિંહ વાઘેલાએ પોતાની 'પ્રજા શક્તિ પાર્ટી' ના નેજા હેઠળ 2 ઓક્ટોબરથી 'વિશ્વાસ સંમેલન' યોજી ભાજપ સામે આક્રમક પ્રચાર કરવાની જાહેરાત પણ કરી હતી અને કોંગ્રેસમાં જોડાવાનો સ્પષ્ટ ઇનકાર કર્યો હતો. પરંતુ બદલાતા રાજકીય સમીકરણો અને સ્થાનિક સ્વરાજ્યની ચૂંટણીઓ વચ્ચે હજુ પણ સત્તાવાર જાહેરાત અંગે સસ્પેન્સ બનેલું છે.