બગસરા હડાળા ગામમાં યુવકની નગ્ન તસવીરોની ધમકીથી 16.30 લાખની બળજબરીપૂર્વક ઉઘરાણી

બગસરા હડાળા ગામમાં એક યુવકને પ્રેમજાળમાં ફસાવીને તેની પ્રાઇવેટ પાર્ટની તસવીરો અને સ્ક્રીનશોટ્સ લઈ, તેને વાયરલ કરવાની ધમકી આપી અને જાનથી મારી નાખવાની ભયાનક કાવતરું રચાયું. આરોપીઓએ પૂર્વઆયોજિત રીતે આ ગુનાને અંજામ આપ્યો.

આ કાવતરામાં નીલમ કાકડિયા નામની યુવતીએ વોટ્સએપ મારફતે યુવક સાથે સંપર્ક સાધ્યો અને પ્રેમભરી વાતો કરીને વિશ્વાસ કેળવ્યો. વિડિયો કોલ દરમિયાન યુવકને નગ્ન થવાનું કહી, તેની જાણ વગર ફોટા અને સ્ક્રીનશોટ્સ લઈ લીધા. આ ફોટાઓ સોશિયલ મીડિયા પર વાયરલ કરવાની ધમકી આપીને, તેણે યુવક પાસેથી ઓનલાઈન અને આંગડિયા મારફતે 8,94,110 રૂપિયા પડાવી લીધા.

પ્રતિક પાઘડાળ નામના અન્ય શખ્સે પણ યુવકનો સંપર્ક કરી ફોટા વાયરલ ન કરવા અને મામલો થાળે પાડવા માટે દબાણ કર્યું. તેણે સેટલમેન્ટ માટે વધુ 7,36,000 રૂપિયા અલગ-અલગ ખાતાઓમાં ટ્રાન્સફર કરાવી લીધા. આમ, બંને આરોપીઓએ મળીને ફરિયાદી પાસેથી કુલ 16,30,110 રૂપિયા પડાવી લીધા.

ત્રીજા આરોપી અવિનાશ પટેલે વોટ્સએપ પર યુવકને ગાળો ભાંડી અને હાથ-પગ ભાંગી નાખવાની ધમકી આપી, વધુ રૂપિયાની બળજબરીપૂર્વક ઉઘરાણી શરૂ કરી. પોલીસ આ મામલે ગુનો નોંધાવી આગળની કાયદેસરની તપાસ હાથ ધરાઈ છે.