પોશીના પોલીસે વલસાડી ગામે કપાસની આડમાં ગાંજાનું ગેરકાયદેસર વાવેતર ઝડપી પાડ્યું, રૂ. 16 લાખથી વધુનો જથ્થો જપ્ત

પોશીના પોલીસ સ્ટેશન વિસ્તારના વલસાડી ગામે કપાસના વાવેતરની આડમાં મોટા પાયે ગાંજાનું ગેરકાયદેસર વાવેતર ઝડપી પાડવામાં આવ્યું છે. પોલીસે 32.734 કિલોગ્રામ ગાંજો, જેની કિંમત આશરે રૂ. 16,36,700 થાય છે, તે જપ્ત કર્યો છે અને એક આરોપીની ધરપકડ કરી કાયદેસરની કાર્યવાહી હાથ ધરી છે.

સાબરકાંઠા જિલ્લા પોલીસ અધિક્ષક ડૉ. પાર્થરાજસિંહ ગોહિલ (IPS)ના નિર્દેશાનુસાર, જિલ્લામાં યુવાધન નશાના રવાડે ન ચડે અને નાર્કોટિક પદાર્થોનું વેચાણ અટકાવવાના "SAY NO TO DRUGS મિશન" અને "ડ્રગ્સ મુક્ત સાબરકાંઠા"ના સૂત્રને સાર્થક કરવા માટે પોલીસ દ્વારા સઘન કાર્યવાહી કરવામાં આવી રહી છે. આ ઝુંબેશના ભાગરૂપે, નાયબ પોલીસ અધિક્ષક શ્રી ડૉ. કુલદિપકુમાર નાયીના માર્ગદર્શન હેઠળ પોશીના પોલીસ સ્ટેશનના સ્ટાફ દ્વારા સતત વોચ અને તપાસ રાખવામાં આવી રહી હતી.

પોશીના પોલીસ પેટ્રોલીંગ દરમિયાન, બાતમી હકીકત મળી હતી કે વલસાડી ગામના મુખી ફળામાં રહેતા દીપકભાઈ હીરાભાઈ બુંબડીયા તેમના ખેતરમાં કપાસના વાવેતરની આડમાં ગેરકાયદેસર રીતે ગાંજાનું વાવેતર કરી રહ્યા છે. આ બાતમીના આધારે, પોલીસની ટીમ તાત્કાલિક ઘટનાસ્થળે પહોંચી અને તપાસ કરતાં કપાસના પાકની વચ્ચે ગાંજાનું વાવેતર મળી આવ્યું હતું.

પોલીસે તાત્કાલિક કાર્યવાહી કરીને આરોપી દીપકભાઈ હીરાભાઈ બુંબડીયાને ઝડપી પાડ્યો હતો અને તેમના કબજામાંથી કુલ 32.734 કિલોગ્રામ ગાંજો, જેની અંદાજિત કિંમત રૂ. 16,36,700 થાય છે, તે મુદ્દામાલ જપ્ત કર્યો છે. પોલીસે આરોપી વિરુદ્ધ NDPS એક્ટ મુજબ ગુનો નોંધી કાયદેસરની કાર્યવાહી હાથ ધરી છે. પોશીના પોલીસ દ્વારા આ રીતે NDPS એક્ટ હેઠળનો મોટો ગુનો શોધી કાઢી પ્રશંસનીય કામગીરી કરવામાં આવી છે.