સુરતના વેલંજામાં 150 વીઘામાં બનશે ‘અન્નપૂર્ણા ખોડલધામ’, પાટીદાર સમાજમાં અનેરો ઉત્સાહ

સુરતના વેલંજા ગામ ખાતે 150 વીઘા જેટલી વિશાળ જમીનમાં ‘અન્નપૂર્ણા ખોડલધામ’ના નિર્માણની જાહેરાત પાટીદાર સમાજના અગ્રણી મુકેશ પટેલ દ્વારા કરવામાં આવી છે. આ જાહેરાત નવરાત્રીના પવિત્ર પર્વ દરમિયાન ભવ્ય શેરી ઓટલો ગરબા કાર્યક્રમમાં કરવામાં આવી હતી, જેના પગલે સમગ્ર મેદાન ‘જય ખોડિયાર’ના નાદથી ગુંજી ઉઠ્યું હતું.

આ પ્રસંગે ઉપસ્થિત સમાજના અગ્રણીઓ અને લોકો સમક્ષ ભાવિ ‘શ્રી અન્નપૂર્ણા ખોડલધામ’ની એક વિશેષ ઝાંખી પણ રજૂ કરવામાં આવી હતી. આ જાહેરાતથી સુરત સહિત સમગ્ર ગુજરાતના પાટીદાર સમાજમાં ભારે ઉત્સાહ અને આનંદની લાગણી વ્યાપી ગઈ છે.

આ નવનિર્મિત ધામ સુરતમાં વસતા આશરે 25 લાખ પાટીદારો, ખાસ કરીને લેઉવા પટેલ સમાજ માટે એક ભવ્ય આસ્થાનું કેન્દ્ર બનશે. સુરતમાં હાલ ઉમિયાધામના 6 મંદિરો છે, પરંતુ લેઉવા પટેલ સમાજ માટે કોઈ મુખ્ય આસ્થાનું કેન્દ્ર ન હોવાની ખામીને ધ્યાનમાં રાખીને, સમાજના 10-15 અગ્રણી ઉદ્યોગપતિઓએ આ સંકલ્પ લીધો છે. આ મંદિર ટ્રસ્ટના પ્રમુખ તરીકે જયંતીભાઈ એકલારા સેવા આપશે.