અરજણસુખમાં સિંહણનો 12 કલાકમાં 5 પર હુમલો, બાદમાં હડકવાથી મૃત્યુ

1 ઓક્ટોબરની રાત્રે વડીયા તાલુકાના અરજણસુખ ગામમાં સિંહણે 12 કલાકમાં પાંચ લોકો પર હુમલો કર્યો, જેનાથી ગામમાં ભયનો માહોલ ફેલાયો.

મધરાતે અરજણસુખ ક્રોસરોડ પાસે બાઈક પર જઈ રહેલા તોરડી ગામના મેહુલ વાજા અને ભગીરથ બસિયા પર સિંહણે પ્રથમ હુમલો કર્યો. વહેલી સવારમાં અન્ય બે ખેડૂતો અને વન વિભાગના એક કર્મચારી પર પણ હુમલો થયો.

ઘટનાની જાણ થતાં જ વડીયા વન વિભાગની ટીમ દોડી આવી. લગભગ 12 કલાકની ભારે જહેમત બાદ 2 ઓક્ટોબર સાંજે સિંહણને બેભાન કરી પાંજરે પૂરીને જસાધાર એનિમલ કેર સેન્ટર ખાતે ખસેડવામાં આવી.

6 ઓક્ટોબરે સારવાર દરમિયાન સિંહણનું મોત થયું. વન વિભાગના અધિકારીઓએ જણાવ્યું કે સિંહણમાં હડકવા જેવા લક્ષણો જોવા મળ્યા, જેને કારણે તે અસામાન્ય રીતે આક્રમક બની. તેના મગજના સેમ્પલ તપાસ માટે આનંદ એગ્રીકલ્ચર યુનિવર્સિટી મોકલવામાં આવ્યા.

આ ઘટના બાદ વન વિભાગે આસપાસના ગામોમાં લોકોને રાત્રે અવરજવર ન કરવા અને સાવચેત રહેવા અપીલ કરી છે.