કાલોલમાં શંકાસ્પદ સરકારી અનાજનો જથ્થો સીઝ: રૂ. 1.18 લાખનો મુદ્દામાલ કબજે

પંચમહાલ જિલ્લાના કાલોલ શહેરમાં મામલતદાર અને પુરવઠા વિભાગ દ્વારા એક મોટી કાર્યવાહી કરવામાં આવી છે. શક્તિ એન્ટરપ્રાઇઝ નામની દુકાનમાંથી શંકાસ્પદ સરકારી અનાજનો જથ્થો ઝડપી પાડવામાં આવ્યો છે. આ અંગેની જાણ થતાં જ પુરવઠા વિભાગની ટીમ તાત્કાલિક સ્થળ પર પહોંચી હતી.

પ્રાપ્ત માહિતી અનુસાર, સ્થળ પરથી કુલ 150 કિલો ઘઉં, 582 કિલો ચોખા અને 323 કિલો ચણા મળી આવ્યા હતા. આ જથ્થાની અંદાજિત કિંમત રૂ. 1.18 લાખ રૂપિયા જેટલી થાય છે. પુરવઠા વિભાગે આ સમગ્ર જથ્થાને સીઝ કરી લીધો છે.

આ મામલે પુરવઠા વિભાગ દ્વારા વધુ તપાસ હાથ ધરવામાં આવી છે. શંકાસ્પદ અનાજનો જથ્થો ક્યાંથી આવ્યો અને તેનો ઉપયોગ શું થવાનો હતો તે દિશામાં તપાસ કેન્દ્રિત કરવામાં આવી છે. આ કાર્યવાહીથી બજારમાં ચાલતી ગેરપ્રવૃત્તિઓ પર લગામ કસવામાં આવશે તેવી અપેક્ષા છે.