સુરત: નવરાત્રી પહેલા રોમિયોગીરી અને મોડીફાઇડ સાઇલેન્સર સામે પોલીસની કાર્યવાહી, 11 બાઇક ડિટેઇન

નવરાત્રીના તહેવારને લઈને સુરત પોલીસ દ્વારા કાયદો અને વ્યવસ્થા જાળવવા માટે ખાસ પગલાં લેવામાં આવી રહ્યા છે. આ અંતર્ગત, અડાજણ પોલીસ દ્વારા જાહેર માર્ગો પર થતી રોમિયોગીરી અને ધૂમ સ્ટાઇલમાં મોડીફાઇડ સાઇલેન્સર લગાવી અવાજ કરતા વાહનચાલકો સામે કડક કાર્યવાહી કરવામાં આવી છે.

પોલીસે મોટર વાહન અધિનિયમ હેઠળ નિયમોનું ઉલ્લંઘન કરતી કુલ 11 બાઇકને ડિટેઇન કરી છે. આ કાર્યવાહીથી આવા કૃત્યો કરતા શખ્સોમાં ફફડાટ વ્યાપી જવા પામ્યો છે. પોલીસ દ્વારા વાહનચાલકોને ટ્રાફિક નિયમોનું પાલન કરવા અને શાંતિપૂર્ણ રીતે તહેવાર ઉજવવા અપીલ કરવામાં આવી છે.

અડાજણ પોલીસ દ્વારા આ ડિટેઇન કરાયેલી બાઇક સામે કાયદેસરની કાર્યવાહી હાથ ધરવામાં આવી છે. આ પ્રકારની કાર્યવાહી ભવિષ્યમાં પણ ચાલુ રાખવામાં આવશે તેમ પોલીસ સૂત્રો દ્વારા જણાવવામાં આવ્યું છે, જેથી શહેરમાં શાંતિપૂર્ણ વાતાવરણ જળવાઈ રહે.