ભરૂચ: જોલવા ગામમાં નશીલી ગોળીઓનો મોટો જથ્થો ઝડપાયો, એક આરોપીની ધરપકડ

ભરૂચ જિલ્લાના જોલવા ગામે એન્ટી નાર્કોટિક્સ વિંગ દ્વારા એક મોટા દરોડા દરમિયાન નશીલી ગોળીઓનો જંગી જથ્થો ઝડપી પાડવામાં આવ્યો છે. આ કાર્યવાહીમાં પોલીસને ₹6.70 લાખની કિંમતની 13.4 કિલો 'તરંગ વિજયાવટી’ નામની ગોળીઓ મળી આવી હતી. આ મામલે પોલીસે એક આરોપીની ધરપકડ કરી કાયદેસરની કાર્યવાહી હાથ ધરી છે.

પ્રાથમિક તપાસમાં એવી વિગતો સામે આવી છે કે આ નશીલી ગોળીઓનો જથ્થો રાજસ્થાનથી મંગાવવામાં આવતો હતો. પોલીસે આરોપી પાસેથી મળી આવેલી ગોળીઓ અને અન્ય મુદ્દામાલ કબજે લીધો છે અને આ રેકેટમાં અન્ય કોણ કોણ સામેલ છે તે દિશામાં ઊંડાણપૂર્વક તપાસ શરૂ કરી છે.

એન્ટી નાર્કોટિક્સ વિંગની આ સફળ કાર્યવાહીથી સ્થાનિક વિસ્તારમાં ચકચાર મચી જવા પામી છે. પોલીસે નશીલા પદાર્થોના વેચાણ અને તેના નેટવર્કને નેસ્તનાબૂદ કરવા માટે કડક પગલાં ભરવાની ખાતરી આપી છે.