કૃષ્ણનગર સોસાયટીમાં CC રોડ પ્રોજેક્ટ 15% પૂર્ણ, મહિલાઓએ ભાજપને વોટ ન આપવાની ચીમકી

સોસાયટીઓમાં CC રોડ બનાવવાની મંજૂરી મળ્યાના બે વર્ષ બાદ પણ માત્ર 15 ટકા કામગીરી જ પૂર્ણ થઈ શકી છે. તંત્રની આ ગોકળગાય ગતિને કારણે 6,803 પરિવારો રોજિંદી અવરજવરમાં ભારે હાલાકી ભોગવી રહ્યા છે.

ખાસ કરીને કૃષ્ણનગર સોસાયટીના રહીશોમાં ભારે આક્રોશ જોવા મળી રહ્યો છે. સ્થાનિક મહિલાઓએ આક્ષેપ લગાવ્યો છે કે, એક તરફ પ્રજા ખાડા, કાદવ અને પથ્થરોવાળા રસ્તાઓથી પરેશાન છે ત્યારે બીજી તરફ ટેક્સના પૈસે સત્તાધારી પક્ષના નેતાઓ ઓફિસોમાં બેસીને 'ભજીયા પાર્ટી'ની મજા માણી રહ્યા છે.

આ પરિસ્થિતિથી ત્રસ્ત મહિલાઓએ આગામી ચૂંટણીમાં ભાજપને પોતાની સોસાયટીમાંથી એક પણ વોટ ન આપવાની ખુલ્લી ચીમકી ઉચ્ચારી છે. આ પગલાએ સ્થાનિક રાજકીય ગતિવિધિઓમાં નવી ગતિ લાવવાની શક્યતા ઊભી કરી છે.