నిర్వాసితులకు పరిహారం ఖరారుకు కసరత్తు శాండీకోరిలో ఇళ్లు, కట్టడాల కొలతలు.. విలువల నమోదు
అప్పర్ సీలేరు పంప్డ్ స్టోరేజ్ పవర్ ప్రాజెక్టు కారణంగా ప్రభావితమయ్యే కుటుంబాలకు పరిహారం నిర్ణయించే దిశగా అధికారులు క్షేత్రస్థాయి పరిశీలన చేపట్టారు. గూడెంకొత్తవీధి మండలం శాండీకోరి గ్రామంలో ప్రాజెక్టు అలైన్మెంట్ పరిధిలోకి వచ్చే ఇళ్లు, ఇతర నిర్మాణాలను వివిధ శాఖల ఇంజినీర్లు పరిశీలించారు. పంచాయతీరాజ్, రోడ్లు భవనాలు, గిరిజన సంక్షేమ శాఖలకు చెందిన అసిస్టెంట్ ఇంజినీర్లు నిర్మాణాల వివరాలు సేకరించి వాటి విలువలను నమోదు చేస్తున్నారు. ఈ కార్యక్రమాన్ని తహసీల్దార్ హెచ్. అన్నాజీరావు పర్యవేక్షిస్తున్నారు. ప్రభుత్వ నిబంధనలకు అనుగుణంగా నిర్మాణాల విలువలను అంచనా వేసి నివేదికలు సిద్ధం చేస్తున్నట్లు అధికారులు తెలిపారు. ఈ మదింపు ఆధారంగా నిర్వాసిత కుటుంబాలకు అందించాల్సిన పరిహారం నిర్ణయించనున్నారు.