ਪੰਜਾਬ : ਬੇਕਾਬੂ ਕਾਰ ਨੇ ਝੁੱਗੀਆਂ ’ਚ ਮਚਾਇਆ ਕਹਿਰ, ਸੁੱਤੇ ਪਿਓ-ਧੀ ਨੂੰ ਦਰੜਿਆ

ਪੰਜਾਬ : ਬੇਕਾਬੂ ਕਾਰ ਨੇ ਝੁੱਗੀਆਂ ’ਚ ਮਚਾਇਆ ਕਹਿਰ, ਸੁੱਤੇ ਪਿਓ-ਧੀ ਨੂੰ ਦਰੜਿਆ
‎Monday, Nov 09, 2026 - 05:04 PM।
‎ਬਠਿੰਡਾ(need24)- ਸ਼ਹਿਰ 'ਚ ਐਤਵਾਰ ਤੜਕਸਾਰ ਤੇਜ਼ ਰਫ਼ਤਾਰ ਦਾ ਕਹਿਰ ਉਸ ਸਮੇਂ ਦੇਖਣ ਨੂੰ ਮਿਲਿਆ, ਜਦੋਂ ਗੋਨਿਆਣਾ ਰੋਡ ਤੋਂ ਬਠਿੰਡਾ ਵੱਲ ਆ ਰਹੀ ਇੱਕ ਬੇਕਾਬੂ ਸਵਿਫਟ ਕਾਰ ਸੜਕ ਕਿਨਾਰੇ ਬਣੀਆਂ ਝੁੱਗੀਆਂ ਵਿੱਚ ਜਾ ਵੜੀ। ਕਾਰ ਨੇ ਝੁੱਗੀ ਵਿੱਚ ਗੂੜ੍ਹੀ ਨੀਂਦ ਸੁੱਤੇ 40 ਸਾਲਾ ਪਿਤਾ ਅਤੇ ਉਸ ਦੀ 16 ਸਾਲਾ ਧੀ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਦੋਵਾਂ ਦੀਆਂ ਲੱਤਾਂ ਵਿੱਚ ਫਰੈਕਚਰ ਹੋ ਗਿਆ। ਕਾਰ ਨੇ ਉੱਥੇ ਖੜ੍ਹੀਆਂ ਦੋ ਮੋਟਰਸਾਈਕਲਾਂ ਨੂੰ ਵੀ ਟੱਕਰ ਮਾਰ ਕੇ ਨੁਕਸਾਨ ਪਹੁੰਚਾਇਆ ਅਤੇ ਕਈ ਝੁੱਗੀਆਂ ਨੂੰ ਤਬਾਹ ਕਰਦੀ ਹੋਈ ਮਿੱਟੀ ਦੇ ਢੇਰ ਨਾਲ ਜਾ ਟਕਰਾਈ। ਹਾਦਸੇ ਤੋਂ ਬਾਅਦ ਮੌਕੇ ’ਤੇ ਚੀਕ-ਚਿਹਾੜਾ ਮਚ ਗਿਆ।
‎ਜਾਣਕਾਰੀ ਅਨੁਸਾਰ ਝੀਲ ਨੰਬਰ-2 ਦੇ ਸਾਹਮਣੇ ਸੜਕ ਕਿਨਾਰੇ ਝਾੜੂ ਬਣਾਉਣ ਦਾ ਕੰਮ ਕਰਨ ਵਾਲੇ ਕਈ ਪਰਿਵਾਰ ਝੁੱਗੀਆਂ ਬਣਾ ਕੇ ਰਹਿੰਦੇ ਹਨ। ਐਤਵਾਰ ਤੜਕਸਾਰ ਪਰਿਵਾਰਕ ਮੈਂਬਰ ਆਪਣੀਆਂ ਝੁੱਗੀਆਂ ਵਿੱਚ ਸੁੱਤੇ ਹੋਏ ਸਨ। ਇਸੇ ਦੌਰਾਨ ਗੋਨਿਆਣਾ ਰੋਡ ਤੋਂ ਬਠਿੰਡਾ ਵੱਲ ਆ ਰਹੀ ਤੇਜ਼ ਰਫ਼ਤਾਰ ਸਵਿਫਟ ਕਾਰ ਅਚਾਨਕ ਬੇਕਾਬੂ ਹੋ ਕੇ ਸਿੱਧੀ ਝੁੱਗੀਆਂ ਵਿੱਚ ਜਾ ਵੜੀ। ਕਾਰ ਦੀ ਲਪੇਟ ਵਿੱਚ ਆਉਣ ਕਾਰਨ ਖਸਤਰ (40) ਪੁੱਤਰ ਛੱਤਰਾ ਅਤੇ ਉਸ ਦੀ 16 ਸਾਲਾ ਧੀ ਮੋਹਿਨੀ ਗੰਭੀਰ ਜ਼ਖ਼ਮੀ ਹੋ ਗਏ। ਦੋਵਾਂ ਦੀਆਂ ਲੱਤਾਂ ਵਿੱਚ ਗੰਭੀਰ ਸੱਟਾਂ ਲੱਗੀਆਂ। ਅਚਾਨਕ ਵਾਪਰੇ ਇਸ ਹਾਦਸੇ ਕਾਰਨ ਝੁੱਗੀਆਂ ਵਿੱਚ ਰਹਿਣ ਵਾਲੇ ਲੋਕਾਂ ਵਿੱਚ ਦਹਿਸ਼ਤ ਫੈਲ ਗਈ।
‎ਮੁੱਢਲੀ ਜਾਣਕਾਰੀ ਅਨੁਸਾਰ ਕਾਰ ਚਾਲਕ ਗੋਨਿਆਣਾ ਦਾ ਰਹਿਣ ਵਾਲਾ ਹੈ ਅਤੇ ਸਬਜ਼ੀ ਵਿਕਰੇਤਾ ਦੱਸਿਆ ਜਾ ਰਿਹਾ ਹੈ। ਉਹ ਸਵੇਰੇ ਬਠਿੰਡਾ ਦੀ ਸਬਜ਼ੀ ਅਤੇ ਫਲ ਮੰਡੀ ਵਿੱਚ ਫਲ ਖਰੀਦਣ ਲਈ ਆ ਰਿਹਾ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਰਸਤੇ ਵਿੱਚ ਅਚਾਨਕ ਕੁਝ ਸਾਹਮਣੇ ਆਉਣ ਕਾਰਨ ਉਸ ਦਾ ਕਾਰ ਤੋਂ ਕੰਟਰੋਲ ਖੋ ਗਿਆ ਅਤੇ ਵਾਹਨ ਸਿੱਧਾ ਝੁੱਗੀਆਂ ਵਿੱਚ ਜਾ ਵੜਿਆ।
‎
‎ਹਾਦਸੇ ਦੀ ਸੂਚਨਾ ਮਿਲਣ ’ਤੇ ਥਾਣਾ ਥਰਮਲ ਦੀ ਪੁਲਸ ਨੇ ਮੌਕੇ ’ਤੇ ਪਹੁੰਚ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਅਤੇ ਨੁਕਸਾਨੀ ਕਾਰ ਨੂੰ ਕਬਜ਼ੇ ਵਿੱਚ ਲੈ ਲਿਆ। ਥਾਣਾ ਥਰਮਲ ਦੇ ਮੁਖੀ ਇੰਸਪੈਕਟਰ ਹਰਜੀਤ ਸਿੰਘ ਮਾਨ ਨੇ ਦੱਸਿਆ ਕਿ ਜ਼ਖ਼ਮੀਆਂ ਦੇ ਬਿਆਨ ਦਰਜ ਕੀਤੇ ਜਾ ਰਹੇ ਹਨ। ਬਿਆਨਾਂ ਅਤੇ ਜਾਂਚ ਦੇ ਆਧਾਰ ’ਤੇ ਹਾਦਸੇ ਦੇ ਅਸਲ ਕਾਰਨਾਂ ਦਾ ਪਤਾ ਲਗਾ ਕੇ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ। ਫਿਲਹਾਲ ਇਸ ਮਾਮਲੇ ਵਿੱਚ ਕੋਈ ਕੇਸ ਦਰਜ ਨਹੀਂ ਕੀਤਾ ਗਿਆ ਹੈ।