ରାଜଧାନୀରେ ଠକ ଦମ୍ପତିଙ୍କୁ ଗିରଫ କଲା ପୋଲିସ, ଦେଢ଼ କୋଟି ଟଙ୍କା କରିଥିଲେ ଠକେଇ

ଭୁବନେଶ୍ୱର : ରାଜଧାନୀରେ ଜମି ଓ ଘର ଯୋଗାଇଦେବା ଆଳରେ ପ୍ରାୟ ୧.୪୭ କୋଟି ଟଙ୍କା ଠକେଇ ଅଭିଯୋଗରେ କମିଶନରେଟ୍ ପୋଲିସ ଏକ ଠକ ଦମ୍ପତିଙ୍କୁ ଗିରଫ କରିଛି । ଗିରଫ ହୋଇଥିବା ଏହି ସ୍ବାମୀ ସ୍ତ୍ରୀ ହେଲେ ଭୁବନେଶ୍ୱର ଟଙ୍କପାଣି ରୋଡ୍ ଅଞ୍ଚଳର ଶ୍ରୀମନ୍ତ କଳସ ଓ ସୌମ୍ୟା ଶୁଭଦର୍ଶିନୀ କଳସ ।
ଅଭିଯୁକ୍ତ ଦମ୍ପତି ନିଜକୁ ବଡ଼ ଶିଳ୍ପପତି ଏବଂ ବିଭିନ୍ନ ପ୍ରତିଷ୍ଠିତ କମ୍ପାନୀର ମାଲିକ ଭାବେ ପରିଚୟ ଦେଇ ସାଧାରଣ ଲୋକଙ୍କ ବିଶ୍ୱାସ ଜିତୁଥିଲେ । ଏହା ସହିତ ସେମାନେ ଜଣେ ପୂର୍ବତନ କଂଗ୍ରେସ ବିଧାୟକଙ୍କ ସମ୍ପର୍କୀୟ ଏବଂ କୋଟି କୋଟି ଟଙ୍କାର ସମ୍ପତ୍ତିର ମାଲିକ ବୋଲି ମଧ୍ୟ ମିଛ କହୁଥିଲେ ।
ଅଭିଯୋଗ ଅନୁସାରେ ବେଙ୍ଗାଲୁରୁରେ ରହୁଥିବା ସୁଧୀର ପାଣିଗ୍ରାହୀ ନାମକ ଜଣେ ବ୍ୟକ୍ତିଙ୍କୁ ସହିଦ ନଗର ଅଞ୍ଚଳରେ ଏକ ମୂଲ୍ୟବାନ ପ୍ଲଟ୍ ଓ ଘର କିଣାଇ ଦେବାକୁ କହି ଏହି ଦମ୍ପତି ପ୍ରାୟ ୧ କୋଟି ୪୭ ଲକ୍ଷ ୬୦ ହଜାର ଟଙ୍କା ହଡ଼ପ କରିନେଇଥିଲେ । ସୁଧୀର ସେମାନଙ୍କୁ ଆକାଉଣ୍ଟ ଟ୍ରାନ୍ସଫର ଜରିଆରେ ୧ କୋଟି ଟଙ୍କା ଦେଇଥିବା ବେଳେ ବାକି ପ୍ରାୟ ୪୭.୬୦ ଲକ୍ଷ ଟଙ୍କା ନଗଦ ଆକାରରେ ସେମାନଙ୍କ ଘରକୁ ଯାଇ ପ୍ରଦାନ କରିଥିଲେ ।
ତେବେ ଦୀର୍ଘ ଦିନ ଧରି ଜମି କିମ୍ବା ଟଙ୍କା ନମିଳିବା ପରେ ସୁଧୀର ଠକାମିର ଶିକାର ହୋଇଥିବା ବୁଝିପାରି ପୋଲିସ ନିକଟରେ ଏକ ମାମଲା ଦାୟର କରିଥିଲେ । ଏହି ଅଭିଯୋଗ ଆଧାରରେ ଚନ୍ଦ୍ରଶେଖରପୁର ଥାନା ପୋଲିସ ତଦନ୍ତ କରି ମଙ୍ଗଳବାର ଉଭୟ ସ୍ୱାମୀ-ସ୍ତ୍ରୀଙ୍କୁ ଗିରଫ କରିଛି ।
ପୋଲିସ ବର୍ତ୍ତମାନ ସେମାନଙ୍କର ବ୍ୟାଙ୍କ ଆକାଉଣ୍ଟ କାରବାର ଯାଞ୍ଚ କରିବା ସହ ରାଜଧାନୀରେ ସେମାନେ ଆଉ କେତେ ଜଣଙ୍କୁ ଏଭଳି ମିଛ କହି ଚୂନା ଲଗାଇଛନ୍ତି, ସେ ନେଇ ଅଧିକ ତଦନ୍ତ ଆରମ୍ଭ କରିଛି ।