રાજકોટમાં પાનમાવાને લઈને થયેલી બોલાચાલીમાં હત્યા, ત્રણ આરોપીઓ પકડાયા

છેલ્લા કેટલાય સમયથી શાંત ગણાતું રંગીલું રાજકોટ છેલ્લા 28 દિવસથી રક્ત રંજિત બની ચૂક્યું હોવાનું સામે આવ્યું છે. છેલ્લા 28 દિવસમાં એક નહીં બે નહીં, પરંતુ 6-6 હત્યાએ રાજકોટને હચમચાવી નાખ્યું છે. આવાં વાતાવરણમાં રાજકોટ શહેરના તાલુકા પોલીસ સ્ટેશન વિસ્તારમાં આંબેડકરનગર નજીક 12-13 ઓક્ટોબરની મોડી રાત્રે એક નવી ઘટના સામે આવી છે.

આ ઘટના માત્ર પાનમાવા ખાવા જેવી નજીવી બાબતે શરૂ થયેલી બોલાચાલી હત્યા સુધી પહોંચી હોવાનું સામે આવ્યું છે. આખી ઘટના સીસીટીવી કેમેરામાં કેદ થઈ હોવાનું પણ સામે આવ્યું છે, જેના આધારે પોલીસે તપાસ શરૂ કરી હતી.

સમગ્ર મામલે રાજકોટ શહેર પોલીસ દ્વારા તપાસ કરાઈ હતી, જેમાં હત્યામાં સામેલ મુખ્ય આરોપી અને સગીર સહિત કુલ ત્રણ વ્યક્તિઓને ઝડપી પાડવામાં આવ્યા છે. પોલીસે આ આરોપીઓની ધરપકડ કરીને વધુ તપાસ હાથ ધરી છે.