અમદાવાદ: 'ચલો દિલ્હી' બેનર મુદ્દે કાર્યકરોની અટકાયત, પોલીસ સ્ટેશનનો ઘેરાવ

અમદાવાદ શહેરમાં 'ચલો દિલ્હી'નું બેનર લગાવવાના મુદ્દે પાંચ યુવાનોને રાત્રિના સમયે ગોમતીપુર પોલીસ સ્ટેશન લઈ જવાયા હતા. પોલીસ દ્વારા તેમને જણાવવામાં આવ્યું હતું કે ઉપરથી આદેશ હોવાથી તેમને દિલ્હી જતા રોકવા માટે અટકાયતમાં લેવામાં આવ્યા છે અને 24 કલાક માટે હાઉસ અરેસ્ટ કરવામાં આવ્યા છે. આ દરમિયાન તેમના મોબાઈલ પણ જપ્ત કરવામાં આવ્યા હતા.

આ ઘટનાની જાણ થતાં જ કાર્યકરોના સાથી મિત્રો અને સ્થાનિક લોકો મોટી સંખ્યામાં ગોમતીપુર પોલીસ સ્ટેશન ખાતે એકઠા થયા હતા અને પોલીસ સ્ટેશનનો ઘેરાવ કર્યો હતો. લોકોએ પોલીસની કાર્યવાહી સામે રોષ વ્યક્ત કર્યો હતો અને કાર્યકરોની તાત્કાલિક મુક્તિની માંગ કરી હતી.

પોલીસ સૂત્રો પાસેથી મળતી માહિતી મુજબ, આ કાર્યકરો દ્વારા લગાવવામાં આવેલા બેનર અંગે કોઈ ફરિયાદ મળી હતી, જેના આધારે તેમને અટકાયતમાં લેવામાં આવ્યા હતા. જોકે, 'ઉપરથી આદેશ' અને 'દિલ્હી જતા રોકવા' જેવા કારણોને લઈને લોકોમાં ચર્ચાનો વિષય બન્યો હતો.