નવરાત્રિના પ્રથમ નોરતે ચોટીલા ચામુંડા માતાજીના દર્શન માટે વહેલી સવારથી ભક્તો ઉમટ્યા. મંગળા આરતી અને ‘જય ચામુંડા’ના જયઘોષથી પવિત્ર ડુંગર ગુંજી ઊઠ્યો.

સૌરાષ્ટ્રના સુપ્રસિદ્ધ યાત્રાધામ ચોટીલા ખાતે Navratriના પ્રથમ નોરતે ભક્તિ અને શ્રદ્ધાનો અદભુત માહોલ જોવા મળ્યો હતો. જગતજનની મા ચામુંડાના દર્શન કરવા માટે વહેલી સવારથી જ મોટી સંખ્યામાં માઈભક્તો ઉમટી પડ્યા હતા. મંગળા આરતીના દિવ્ય દર્શન કરીને ભક્તોએ માતાજીના ચરણોમાં શીશ ઝુકાવ્યું હતું અને પરિવારની સુખ-શાંતિ, સમૃદ્ધિ તથા સુખાકારી માટે પ્રાર્થના કરી હતી. ‘જય ચામુંડા માતાજી'ના ગગનભેદી જયઘોષથી સમગ્ર ડુંગર ભક્તિમય બની ગયો હતો. નવરાત્રીના પ્રારંભ સાથે જ ચોટીલા ધામમાં આસ્થાનો અનોખો સંગમ જોવા મળ્યો હતો.