ભાવનગરમાં ST બસનો કાળમુખો અકસ્માત: માતા અને 7 વર્ષની દીકરીનાં મોત

ભાવનગરમાં કાળજું કંપાવી દે તેવો ગમખ્વાર અકસ્માત સામે આવ્યો છે. ફૂટપાથ પર બેસીને વાહનની રાહ જોઈ રહેલી માતા અને તેની માત્ર 7 વર્ષની દીકરીને ST બસે અડફેટે લેતાં બંનેનાં ઘટનાસ્થળે જ કરૂણ મોત નીપજ્યાં છે.

પ્રાથમિક માહિતી મુજબ, સિહોર-ટાણા-વરલ રૂટની ST બસ બસ સ્ટેન્ડમાંથી બહાર નીકળી રહી હતી. તે દરમિયાન બસ ચાલકે કાબૂ ગુમાવતા બસ સીધી ફૂટપાથ પર ચડી ગઈ હતી.

ફૂટપાથ પર બેઠેલી માતા અને 7 વર્ષની દીકરી બસની અડફેટે આવી ગયા હતા. ત્યારબાદ બસે નજીકની ભરૂચા ક્લબની દીવાલ સાથે જોરદાર ટક્કર મારી હતી.

આ અકસ્માતમાં અન્ય એક મહિલા પણ ઈજાગ્રસ્ત થઈ હોવાનું સામે આવ્યું છે, જેને તાત્કાલિક સારવાર માટે હોસ્પિટલ ખસેડવામાં આવી છે.

અકસ્મતની ઘટનાથી આસપાસના વિસ્તારમાં ચકચાર મચી ગઈ છે. પોલીસ અને તંત્ર દ્વારા સમગ્ર મામલે તપાસ હાથ ધરવામાં આવી છે.

માતા-દીકરીના કરૂણ મોતથી પરિવારજનોમાં શોકનો માહોલ છવાઈ ગયો છે.