शहा येथे जगाचा मालक संत बाळूमामांचा जन्मोत्सव सोहळा हजारो भाविकांच्या उपस्थितीत संपन्न

शहा तालुका इंदापूर. येथील श्री संत सद्गुरू बाळुमामा मंदिरात आज जगाचा मालक श्री संत बाळुमामांचा जन्मोत्सव सोहळा अत्यंत भक्तिमय आणि उत्साही वातावरणात पार पडला.

आज सकाळी 10 ते 12 या वेळेत महाराष्ट्र केसरी ह.भ.प. लालचंद महाराज चोपडे यांच्या सुश्राव्य कीर्तन सेवेचे आयोजन करण्यात आले होते. महाराजांनी बाळूमामांच्या चरित्रावर आणि भक्ती महात्म्यावर प्रकाश टाकत उपस्थित भाविकांना मंत्रमुग्ध केले. कीर्तनानंतर मंदिरात विधिवत आरती करण्यात आली.

आरतीनंतर हजारो भाविक भक्तांसाठी महाप्रसादाचे आयोजन करण्यात आले होते. परिसरातील व पंचक्रोशीतील हजारो भाविकांनी या महाप्रसादाचा लाभ घेतला व बाळूमामांचे दर्शन घेतले.

यावेळी मंदिर परिसर फुलांनी आणि आकर्षक सजावटीने सजवण्यात आला होता. बाळूमामा, विठ्ठल-रुक्मिणी यांच्या मूर्तींना फुलांच्या माळांनी सजवण्यात आले होते. मंदिर समितीने या सोहळ्याचे उत्कृष्ट नियोजन केले होते.
बाळूमामांच्या चैतन्यदायी वास्तव्याने शहा नगरी आज भक्तिमय झाली होती.