અમદાવાદ: SG હાઈવે પર દંપતીએ પોલીસકર્મીઓ સાથે કરી બબાલ, મહિલા કોન્સ્ટેબલને બચકું ભર્યાનો આરોપ

અમદાવાદના SG હાઈવે-1 ટ્રાફિક પોલીસ સ્ટેશનમાં એક દંપતી દ્વારા પોલીસકર્મીઓ સાથે બબાલ કરવાની ઘટના સામે આવી છે. જગમાલ વાઘેલા અને ટીન્કલબહેન નામના આ દંપતીએ અગાઉના એક કેસ સંબંધિત નોટિસ સ્વીકારવાનો ઈનકાર કર્યો હતો. આ દરમિયાન મામલો વણસતા ઉગ્ર સ્વરૂપ ધારણ કર્યું હતું.

પ્રત્યક્ષદર્શીઓના જણાવ્યા અનુસાર, પરિસ્થિતિ વણસતા ટીન્કલબહેને ફરજ પર હાજર મહિલા કોન્સ્ટેબલને બચકું ભર્યું હોવાનો ગંભીર આરોપ છે. આ ઉપરાંત, જગમાલ વાઘેલા પર ફરજ પરના કોન્સ્ટેબલ પર થૂંકવાનો અને એટ્રોસિટી એક્ટ હેઠળ કાર્યવાહી કરવાની ધમકી આપવાનો પણ આરોપ મૂકવામાં આવ્યો છે.

આ સમગ્ર ઘટના બાદ પોલીસે તાત્કાલિક પગલાં લીધા હતા. પોલીસે જગમાલ વાઘેલા અને ટીન્કલબહેન બંને વિરુદ્ધ સરકારી ફરજમાં રુકાવટ સહિતની સંબંધિત કલમો હેઠળ ગુનો નોંધી કાયદેસરની કાર્યવાહી હાથ ધરી છે. આ મામલે વધુ તપાસ ચાલી રહી છે.