ગુજરાતમાં હવે કોર્પોરેશન હદમાં નવા રસ્તા RCCના જ બનશે: CM ભૂપેન્દ્ર પટેલની જાહેરાત

ગુજરાતના મુખ્યમંત્રી ભૂપેન્દ્ર પટેલે શહેરી વિસ્તારના વિકાસ કામો અને રોડ ઇન્ફ્રાસ્ટ્રક્ચર અંગે મહત્વની જાહેરાત કરી છે. મુખ્યમંત્રીએ સ્પષ્ટ જણાવ્યું છે કે મહાનગરપાલિકા (કોર્પોરેશન) હદ વિસ્તારમાં હવે પછી જે પણ નવા રસ્તાઓ બનશે તે તમામ આર.સી.સી. (RCC) ના જ બનાવવામાં આવશે.

આ નિર્ણયનો મુખ્ય ઉદ્દેશ્ય વરસાદી મોસમમાં ડામર રોડ તૂટવાની સમસ્યાઓથી નાગરિકોને મુક્તિ અપાવવાનો છે. સરકાર ગુણવત્તાસભર કામગીરી પર ભાર મૂકી રહી છે, જેથી લાંબા ગાળા સુધી ટકી રહે તેવી માળખાકીય સુવિધાઓનું નિર્માણ થઈ શકે.

મુખ્યમંત્રીએ વધુમાં જણાવ્યું કે વિકાસ કામો માટે નાણાંની કોઈ કમી રહેવા દેવામાં આવશે નહીં. જોકે, રોડ અને માળખાકીય સુવિધાઓના નિર્માણમાં ગુણવત્તા સાથે કોઈ પણ પ્રકારનું સમાધાન સાંખી લેવામાં આવશે નહીં. આ પગલાં શહેરી વિસ્તારોમાં નાગરિકોને વધુ સારી સુવિધાઓ પૂરી પાડવાના સરકારના પ્રયાસોનો એક ભાગ છે.