ଭାରତୀୟ ସିନେମା ପାଇଁ ବଡ଼ ଖବର; ଓସ୍କାର ଦୌଡ଼ରେ ନିତେଶ ତିୱାରୀଙ୍କ ‘ରାମାୟଣ: ପାର୍ଟ-୧’ ଚୂଡ଼ାନ୍ତ ମନୋନୟନକୁ ନେଇ ବଢ଼ିଲା ଉତ୍ସୁକତା

ବଲିଉଡ୍‌ର ବହୁଚର୍ଚ୍ଚିତ ଚଳଚ୍ଚିତ୍ର ‘ରାମାୟଣ: ପାର୍ଟ-୧’କୁ ମିଳିବାକୁ ଯାଉଛି ଆଉ ଏକ ବଡ଼ ଉପଲବ୍ଧି। ଏବେ ଓସ୍କାର ଦୌଡ଼ରେ ସାମିଲ ହେବାକୁ ଯାଉଛି ନିତେଶ ତିୱାରୀଙ୍କ ନିର୍ଦ୍ଦେଶିତ ଏହି ଫିଲ୍ମ। ୯୯ତମ ଏକାଡେମି ପୁରସ୍କାର ପାଇଁ ବିଚାର ନିମନ୍ତେ ନିର୍ମାତାଙ୍କ ପକ୍ଷରୁ ଏହାକୁ ଦାଖଲ କରାଯାଇଥିବା ଏକ ରିପୋର୍ଟରୁ ଜଣାପଡ଼ିଛି। ଏହି ଖବର ପରେ ଫିଲ୍ମକୁ ନେଇ ସିନେପ୍ରେମୀଙ୍କ ମଧ୍ୟରେ ଉତ୍ସୁକତା ବଢ଼ିଛି।

ତେବେ ଓସ୍କାର ପାଇଁ ଫିଲ୍ମ ଦାଖଲ ହେବା ଏବଂ ଚୂଡ଼ାନ୍ତ ମନୋନୟନ ତାଲିକାରେ ସ୍ଥାନ ପାଇବା ଦୁଇଟି ଭିନ୍ନ ପ୍ରକ୍ରିୟା। ଏଥିପାଇଁ ଫିଲ୍ମକୁ ଏକାଡେମିର ନିର୍ଦ୍ଧାରିତ ଯୋଗ୍ୟତା ଓ ଚୟନ ପ୍ରକ୍ରିୟା ଦେଇ ଗତି କରିବାକୁ ପଡ଼ିବ।

ଅନ୍ୟପଟେ ମରାଠୀ ଫିଲ୍ମ ‘ଗୋନ୍ଧଲ’କୁ ଆନ୍ତର୍ଜାତିକ ଫିଚର ଫିଲ୍ମ ବର୍ଗରେ ଭାରତର ଆଧିକାରିକ ମନୋନୟନ ଭାବେ ଘୋଷଣା କରାଯାଇଛି। କିନ୍ତୁ ଏହାଦ୍ୱାରା ଅନ୍ୟ ଭାରତୀୟ ଫିଲ୍ମଗୁଡ଼ିକର ଓସ୍କାର ଦୌଡ଼ରେ ସାମିଲ ହେବାର ରାସ୍ତା ବନ୍ଦ ହୁଏ ନାହିଁ। ଯୋଗ୍ୟତା ନିୟମ ପୂରଣ କରୁଥିବା ଅନ୍ୟ ଫିଲ୍ମ ମଧ୍ୟ ସ୍ୱାଧୀନ ଭାବେ ବିଚାର ପାଇଁ ଦାଖଲ ହୋଇପାରିବ।

ନଭେମ୍ବର ୫ରେ ପ୍ରେକ୍ଷାଳୟକୁ ଆସିଥିବା ‘ରାମାୟଣ: ପାର୍ଟ-୧’କୁ ଦର୍ଶକଙ୍କଠାରୁ ମିଶ୍ରିତ ପ୍ରତିକ୍ରିୟା ମିଳୁଛି। ଫିଲ୍ମର କିଛି କଳାକାରଙ୍କ ଅଭିନୟ ଦର୍ଶକଙ୍କ ମନ ଜିତିଥିବା ବେଳେ ସଙ୍ଗୀତ ଓ ଭାବପ୍ରବଣତାକୁ ନେଇ ଭିନ୍ନ ଭିନ୍ନ ମତ ଆସୁଛି। ଏବେ ଓସ୍କାର ପାଇଁ ଦାଖଲ ହେବା ପରେ ଅନ୍ତର୍ଜାତୀୟ ମଞ୍ଚରେ ଫିଲ୍ମଟି କେତେ ସଫଳତା ପାଉଛି, ତାହା ଉପରେ ସମସ୍ତଙ୍କ ନଜର।