સુરેન્દ્રનગરમાં નવા વર્ષની શરૂઆતમાં ચોટીલા ચામુંડા ધામમાં ભક્તોની ભારે ભીડ

સુરેન્દ્રનગર જિલ્લાના ચોટીલામાં આવેલા ચામુંડા ધામમાં નવા વર્ષની શરૂઆતના પ્રથમ દિવસે વહેલી સવારથી જ ભક્તોની ભારે ભીડ જોવા મળી હતી. હજારો શ્રદ્ધાળુઓ ડુંગરની તળેટીથી મંદિર સુધી લાંબી કતારોમાં ઉભા રહીને માતાજીના દર્શન અને આશીર્વાદ મેળવવા માટે પહોંચ્યા હતા.

ચાર રાજ્યોમાંથી ભક્તોએ ચામુંડા ધામમાં દર્શન માટે આગમન કર્યું. ગુજરાત ઉપરાંત મહારાષ્ટ્ર, રાજસ્થાન અને મધ્યપ્રદેશના ભક્તોએ ‘બોલ મારી ચામુંડ, જય જય ચામુંડ’ના નાદ ગુંજી ઉઠ્યા હતા. નવા વર્ષની શરૂઆત માતાજીના આશીર્વાદ સાથે કરવા માટે ભક્તોમાં ભારે ઉત્સાહ જોવા મળ્યો.

મંદિર ટ્રસ્ટ અને પોલીસ વિભાગ દ્વારા ભક્તોને કોઈ મુશ્કેલી ન પડે તે માટે જરૂરી વ્યવસ્થાઓ કરવામાં આવી હતી. દર્શનાર્થે આવતા ભક્તોએ મંદિરના ભોજનાલયમાં પ્રસાદ પણ લીધો. મંદિરની આસપાસ સુરક્ષા અને વ્યવસ્થિત પ્રવાહ સુનિશ્ચિત કરવામાં આવ્યો.

ચામુંડા મંદિર સુરેન્દ્રનગર જિલ્લામાં અમદાવાદ-રાજકોટ હાઈવે પર આવેલા ચોટીલાના ડુંગર પર મા ચામુંડા બિરાજમાન છે. ધાર્મિક માન્યતા મુજબ મા ચામુંડા 64 જોગણી પૈકીના એક અવતાર માનવામાં આવે છે અને ભક્તો માનતા હોય છે કે તે તેમના દુઃખ-દર્દ દૂર કરે છે. દરરોજ હજારો ભક્તો અહીં દર્શનાર્થે આવે છે, ખાસ કરીને નવરાત્રિ અને નવા વર્ષની શરૂઆતમાં.