સુરત મહાનગરપાલિકાએ ચૌટા બજારમાં ગેરકાયદે દબાણકર્તાઓને દૂર કર્યા

સુરત મહાનગરપાલિકાએ આજે ચૌટા બજારમાં ગેરકાયદે દબાણકર્તાઓને દૂર કરીને દિવાળીના તહેવારો દરમિયાન ભારે ભીડ અને ટ્રાફિક જામને હળવું કર્યું.

દિવાળીના તહેવારોને હવે ગણતરીના દિવસો જ બાકી રહ્યા છે ત્યારે સુરત શહેરના સૌથી વ્યસ્ત અને લોકપ્રિય ખરીદીના કેન્દ્ર સમાન ચૌટા બજારમાં તહેવારોની ભારે ભીડ જામી રહી છે. બજારમાં ખરીદી માટે આવતા નાગરિકો માટે પગ મૂકવાની કે હાલવાની પણ જગ્યા ન રહે તેવી વિકટ પરિસ્થિતિ સર્જાઈ હતી.

દુકાનોની આગળ-પાછળ વધેલા દબાણો અને લારી-ગલ્લા ધારકોના કારણે ભારે ટ્રાફિક જામની સમસ્યા રોજિંદી બની ગઈ હતી. આ ગંભીર સમસ્યાને ધ્યાને લઈને સુરત મહાનગરપાલિકાના સેન્ટ્રલ ઝોન દ્વારા આજે ચૌટા બજારમાં સઘન દબાણ હટાવવાની કામગીરી હાથ ધરવામાં આવી હતી, જેના કારણે ગેરકાયદે દબાણકર્તાઓમાં ભારે દોડધામ મચી ગઈ હતી.