ନିଯୁକ୍ତି ମେଳାରେ ପୂର୍ବ ସରକାରଙ୍କୁ ଟାର୍ଗେଟ କଲେ ମୁଖ୍ଯମନ୍ତ୍ରୀ ମୋହନ ମାଝୀ

ଭୁବନେଶ୍ୱର :ଶିକ୍ଷକ ନିଯୁକ୍ତି ମେଳାରେ ପୂର୍ବତନ ବିଜେଡି ସରକାରଙ୍କୁ ତୀବ୍ର ସମାଲୋଚନା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସୋମବାର ରାଜ୍ୟର ଯୁବକଯୁବତୀଙ୍କୁ ନିଯୁକ୍ତି ପତ୍ର ବଣ୍ଟନ କରିବା ସହ ସେ ପୂର୍ବ ସରକାରଙ୍କ ନୀତି ଓ କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ ପୂର୍ବ ସରକାରଙ୍କ ସମୟରେ ରାଜ୍ୟରେ କେବଳ 'ଠିକା ବ୍ୟବସ୍ଥା' ଓ ଆଉଟସୋର୍ସିଂ ଚାଲିଥିଲା, ଯାହା ଯୁବପିଢ଼ିଙ୍କ ଭବିଷ୍ୟତ ସହ ଖେଳଥିଲା। କିନ୍ତୁ ବର୍ତ୍ତମାନ ଆମ ସରକାର ଯୁବକଯୁବତୀମାନଙ୍କୁ 'ସ୍ଥାୟୀ ଚାକିରି' ପ୍ରଦାନ କରୁଛନ୍ତି। ପୂର୍ବ ସରକାରଙ୍କ ତ୍ରୁଟିପୂର୍ଣ୍ଣ ନିଯୁକ୍ତି ପ୍ରକ୍ରିୟା ଯୋଗୁଁ ବର୍ଷ ବର୍ଷ ଧରି ରାଜ୍ୟର ପ୍ରଶାସନିକ ଦକ୍ଷତା ପ୍ରଭାବିତ ହୋଇଥିଲା ବୋଲି ମୁଖ୍ଯମନ୍ତ୍ରୀ ।
ମୋହନ ସରକାରଙ୍କ ଅଧୀନରେ ଚାଲିଥିବା ଏହି ନିଯୁକ୍ତି ପ୍ରକ୍ରିୟା ସମ୍ପୂର୍ଣ୍ଣ ସ୍ୱଚ୍ଛ, ନିରପେକ୍ଷ ଏବଂ ଦୁର୍ନୀତିମୁକ୍ତ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି। ଆମେ ସରକାରକୁ ଆସିବା ପରଠାରୁ ୨୮୬୯୩ ଶିକ୍ଷକଙ୍କୁ ନିଯୁକ୍ତି ମିଳିଛି। ରାଜ୍ୟ ସରକାର ଆଗାମୀ ୫ ବର୍ଷ ମଧ୍ୟରେ ୧.୫ ଲକ୍ଷ ସରକାରୀ ଚାକିରି ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି, ଯେଉଁଥିରୁ ପ୍ରଥମ ଦୁଇ ବର୍ଷରେ ୬୫,୦୦୦ ପଦବୀ ପୂରଣ କରାଯିବ।
ଆଜି ମୁଖ୍ୟମନ୍ତ୍ରୀ ୨୧୩୭ ଜଣ ତପସିଲଭୁକ୍ତ ଜାତି ଓ ତଫସିଲଭୁକ୍ତ ଜନଜାତି ବର୍ଗର ପ୍ରାର୍ଥୀଙ୍କୁ ନିଯୁକ୍ତିପତ୍ର ବଣ୍ଟନ କରିଛନ୍ତି । ୧୯୯୩ ଜଣ ସେବକ-ସେବିକା ଓ ୧୪୪ ଶିକ୍ଷକ-ଶିକ୍ଷୟିତ୍ରୀଙ୍କୁ ନିଯୁକ୍ତି ପତ୍ର ଦିଆଯାଇଛି।ରାଜ୍ୟ ସରକାରଙ୍କ ସଂଖ୍ୟାଲଘୁ ସଂପ୍ରଦାୟ ଓ ପଛୁଆ ବର୍ଗ କଲ୍ୟାଣ ବିଭାଗ ଆନୁକୂଲ୍ୟରେ ଆୟୋଜିତ ଏକ ସ୍ୱତନ୍ତ୍ର ନିଯୁକ୍ତି ମେଳାରେ ଏହି ସଫଳ ପ୍ରାର୍ଥୀମାନଙ୍କୁ ଚାକିରି ପ୍ରଦାନ କରାଯାଇଛି ।