ବିପଦ ସଙ୍କେତ ଉପରେ ଜଳକା, ଋଷିକୂଲ୍ୟା ଓ ଘୋଡ଼ାହାଡ଼ ନଦୀ ଜଳ ସ୍ତର

ଭୁବନେଶ୍ୱର: ବାତ୍ୟା ‘ଅର୍ଣ୍ଣବ’ ସିନା ଚାଲି ଯାଇଛି, ହେଲେ ଛାଡ଼ି ଯାଇଛି ଦୁର୍ଦ୍ଦଶା । ସେପଟେ ବିଭିନ୍ନ ନଦୀର ଜଳସ୍ତର ବୃଦ୍ଧି ପାଇଛି । ଜଳକା, ଋଷିକୁଲ୍ୟା ଓ ଘୋଡ଼ାହାଡ଼ ନଦୀର ଜଳସ୍ତର ବୃଦ୍ଧି ପାଇବା ପରେ ତଳିଆ ଅଞ୍ଚଳରେ ଛନକା ପଶିଛି ।
ବାଲେଶ୍ୱର ଜିଲ୍ଲା ବସ୍ତା ବ୍ଲକ ମଥାନିଠାରେ ଜଳକା ନଦୀର ଜଳ ସ୍ତର ବିପଦ ସଂକେତ ଉପରେ ପ୍ରବାହିତ ହେଉଛି । ବିପଦ ସଂକେତ ୬.୫୦ ମିଟର ଥିବବେଳେ ଏବେ ଜଳସ୍ତର ୬.୫୮ ମିଟର ଉପରେ ରହିଛି ।
ସେପଟେ ଗଞ୍ଜାମ ଜିଲ୍ଲା ଋଷିକୁଲ୍ୟା ନଦୀର ବନ୍ୟା ଜଳ ବହୁ ଉଚ୍ଚରେ ପ୍ରବାହିତ ହେଉଛି । ପୁରୁଷୋତ୍ତମପୁର ନିକଟରେ ବିପଦ ସଂକେତ ୧୬.୮୩୫ ମିଟର ଥିବାବେଳେ ଏବେ ଜଳସ୍ତର ୧୮.୨୮୦ ମିଟର ରହିଛି ।
ସେହିପରି ଘୋଡ଼ାହାଡ଼ ନଦୀର ବନ୍ୟା ଜଳ କୁରୁଲା ନିକଟରେ ବନ୍ୟା ପାଣି ବିପଦ ସଙ୍କେତ ଟପିଛି । କୁରୁଲା ନିକଟରେ ବିପଦ ସଂକେତ ୩୨.୮୪ ମିଟର ରହିଥିବାବେଳେ ଏବେ ଜଳସ୍ତର ୩୪.୦୮ ମିଟର ରହିଛି ।
ଅନ୍ୟପକ୍ଷେ ବର୍ଷା ଛାଡ଼ିବା ପରେ ବିଭିନ୍ନ ସ୍ଥାନରେ ଲୋକଙ୍କ ଦୁର୍ଦ୍ଦଶା ବଢ଼ିଛି । କେଉଁଠି ରାସ୍ତାଘାଟ ଧୋଇ ଯାଇଛି ତ ଆଉ କେଉଁଠି ଲୋକଙ୍କ ଘରେ ବର୍ଷା ପାଣି ପଶି ସବୁ କିଛି ଛାରଖାର କରିଦେଇଛି । ସେହିପରି ଏକର ଏକର ଚାଷ ଜମିରେ ବର୍ଷା ପାଣି ଭରି ରହିଛି । ଫଳରେ ପାଚିଲା ଧାନ ସହିତ ପନିପରିବା ମଧ୍ୟ କ୍ଷତି ହୋଇଛି ।