ମିଥ୍ୟା ବାତ୍ୟା ପୂର୍ବାନୁମାନ ପ୍ରସାରଣ କଲେ ହେବ ଜେଲ୍- ଓଡ଼ିଶା ସରକାରଙ୍କ କଡ଼ା ଚେତାବନୀ

ମାଲକାନଗିରି , ୨୭ ଅକ୍ଟୋବର : ସୋସିଆଲ ମିଡିଆ, ଡିଜିଟାଲ୍ ପ୍ଲାଟଫର୍ମ ଏବଂ ଗଣମାଧ୍ୟମଗୁଡ଼ିକରେ ଆସନ୍ନ ବାତ୍ୟା ଓ ପ୍ରତିକୂଳ ପାଣିପାଗକୁ ନେଇ ପ୍ରସାରିତ ହେଉଥିବା ଭ୍ରମାତ୍ମକ, ଅନୁମାନଭିତ୍ତିକ ଏବଂ ଚାଞ୍ଚଲ୍ୟକର ଖବର ଉପରେ ଓଡ଼ିଶା ସରକାର ଅତ୍ୟନ୍ତ ଗମ୍ଭୀରତା ପ୍ରକାଶ କରିଛନ୍ତି। ଏହିଭଳି ଅଯଥା ଗୁଜବ ଓ ଅସତ୍ୟ ପୂର୍ବାନୁମାନ ରୋକିବା ପାଇଁ ସ୍ପେଶାଲ ରିଲିଫ୍ କମିଶନରଙ୍କ କାର୍ଯ୍ୟାଳୟ ପକ୍ଷରୁ ଏକ ଜରୁରୀ ସରକାରୀ ସତର୍କତା ସୂଚନା ଜାରି କରାଯାଇଛି।

କିଛି ନିଜକୁ ପାଣିପାଗ ବିଶେଷଜ୍ଞ ବୋଲାଉଥିବା ବ୍ୟକ୍ତି ଓ ଚ୍ୟାନେଲ ବିନା କୌଣସି ବୈଜ୍ଞାନିକ ଆଧାରରେ ବାତ୍ୟାର ଗତିପଥ, ସ୍ଥଳଭାଗ ଛୁଇଁବା ସମୟ ଓ ପ୍ରଭାବକୁ ନେଇ ମନଗଢ଼ା ଖବର ପ୍ରସାରଣ କରୁଛନ୍ତି। ଏହି ଅସତ୍ୟ ପୂର୍ବାନୁମାନ ଯୋଗୁଁ ଚାଷୀମାନେ ଅକାଳରେ ଫସଲ କାଟି ଆର୍ଥିକ କ୍ଷତିର ସମ୍ମୁଖୀନ ହେଉଛନ୍ତି, ସାଧାରଣ ଲୋକଙ୍କ ମଧ୍ୟରେ ଆତଙ୍କିତ ଭୟ ଦ୍ୱାରା ନିତ୍ୟବ୍ୟବହାର୍ଯ୍ୟ ସାମଗ୍ରୀର ଦରବୃଦ୍ଧି ଘଟୁଛି ଏବଂ ସରକାରୀ ବିପର୍ଯ୍ୟୟ ପ୍ରସ୍ତୁତିରେ ବ୍ୟାଘାତ ସୃଷ୍ଟି ହେଉଛି।

ଏଣୁ ସରକାର ସ୍ପଷ୍ଟ କରିଛନ୍ତି ଯେ ବିପର୍ଯ୍ୟୟ ପରିଚାଳନା ଅଧିନିୟମ, ୨୦୦୫ ର ଧାରା ୫୪ ଅନୁଯାୟୀ, କୌଣସି ବିପର୍ଯ୍ୟୟକୁ ନେଇ ମିଥ୍ୟା ସତର୍କତା କିମ୍ବା ଗୁଜବ ପ୍ରସାରଣ କଲେ ଦୋଷୀ ସାବ୍ୟସ୍ତ ବ୍ୟକ୍ତିଙ୍କୁ ୧ ବର୍ଷ ପର୍ଯ୍ୟନ୍ତ କାରାଦଣ୍ଡ କିମ୍ବା ଜରିମାନା କିମ୍ବା ଉଭୟ ଦଣ୍ଡରେ ଦଣ୍ଡିତ କରାଯିବ। ସେହିପରି ଧାରା ୫୧ ଅନୁଯାୟୀ ସରକାରୀ କାର୍ଯ୍ୟରେ ବ୍ୟାଘାତ ସୃଷ୍ଟି କଲେ ମଧ୍ୟ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଭାରତୀୟ ପାଣିପାଗ ବିଭାଗ ହେଉଛି ପାଣିପାଗ ସମ୍ବନ୍ଧୀୟ ସୂଚନା ଦେବା ପାଇଁ ଏକମାତ୍ର ଅଧିକୃତ ସଂସ୍ଥା। ତେଣୁ ସୋସିଆଲ ମିଡିଆ ବ୍ୟବହାରକାରୀ, ୟୁଟ୍ୟୁବର୍ସ, କଣ୍ଟେଣ୍ଟ ସ୍ରଷ୍ଟା ଏବଂ ଗଣମାଧ୍ୟମ ସଂସ୍ଥାଗୁଡ଼ିକୁ କେବଳ ଆଇଏମଡି, ଏସଆରସି ଏବଂ ଜିଲ୍ଲା ପ୍ରଶାସନର ସରକାରୀ ବୁଲେଟିନ୍ ଉପରେ ଭରସା କରି ଖବର ପ୍ରସାରଣ କରିବାକୁ କୁହାଯାଇଛି। ମିଥ୍ୟା ଗୁଜବ ସୃଷ୍ଟି କରୁଥିବା ଡିଜିଟାଲ୍ ପ୍ଲାଟଫର୍ମ ଓ ଆକାଉଣ୍ଟଗୁଡ଼ିକ ଉପରେ ସାଇବର ପୋଲିସ ଏବଂ ଆଇନ ଶୃଙ୍ଖଳା ରକ୍ଷାକାରୀ ସଂସ୍ଥା କଡ଼ା ନଜର ରଖି ମାମଲା ରୁଜୁ କରିବେ।